Segir búin ekki fá afslátt af stöðugleikaskatti

„Það er rangt að slitabú bankanna njóti einhvers afsláttar ef þau greiða stöðugleikaframlag í stað skatts til að leysa þann greiðslujöfnuðarvanda sem þjóðarbúið glímir við,“ segir Benedikt Árnason, efnahagsráðgjafi Sigmundar Davíðs Gunnlaugssonar.

Fréttablaðið óskaði svara frá Sigmundi Davíð Gunnlaugssyni forsætisráðherra vegna umsagnar InDefence-hópsins um frumvarp um stöðugleikaskatt sem liggur fyrir þinginu. Hópurinn vill gera breytingar á frumvarpinu. Stöðugleikaskilyrði eigi að vera jafngild 39 prósenta stöðugleikaskatti. Um 400 milljarða króna tekjumunur er sagður vera á leiðunum.

Benedikt segir í svari sínu að hér sé um að ræða tvær ólíkar en jafngildar aðferðir út frá hagsmunum þjóðarbúsins. Skatturinn sé einskiptis ráðstöfun sem taki mið af stöðu hvers skattaðila eins og hún verður 31. desember næstkomandi. Hann taki hins vegar ekki tillit til áhættu þjóðarbúsins vegna virðisbreytinga á eignum slitabúanna til framtíðar.

„Ólíkt skattinum draga stöðugleikaskilyrðin úr þessari greiðslujöfnuðaráhættu til frambúðar,“ segir Benedikt. Þau skapi ramma sem taki á núverandi og framtíðarvanda vegna slitabúa. Stöðugleikaskatturinn geti því gefið fleiri krónur í ríkiskassann til skamms tíma en stöðugleikaskilyrðin draga verulega úr lengri tíma áhættu.