Flugskeytið barst frá svæði undir stjórn uppreisnarmanna

Enginn vafi er sagður leika á því lengur að malasíska farþegavélin, sem hrapaði yfir austanverðri Úkraínu í sumar, hafi verið skotin niður með flugskeyti af gerðinni Buk, sem framleitt er í Rússlandi.

Þá sé ljóst að flugskeytinu hafi verið skotið frá yfirráðasvæði uppreisnarmanna, sem nutu stuðnings Rússa.

Þetta er fullyrt í ítarlegri lokaskýrslu rannsóknar á hrapi vélarinnar sem hollensk rannsóknarnefnd kynnti í gær.

Tjibbe Joustra, formaður nefndarinnar, sagði allar aðrar skýringar hafa verið útilokaðar. Hann sagði flugvélina hafa sprungið í loftinu. Sumir hlutar hennar hefðu hrapað strax niður en aðrir haldið áfram flugi nokkra kílómetra áður en þeir hröpuðu til jarðar. Brakið hefði dreifst yfir 50 ferkílómetra svæði.

Hann sagði áhöfnina hafa orðið fyrir sprengjubrotum og látist samstundis en að farþegarnir hefðu misst meðvitund innan fárra sekúndna. Flestir voru þeir Hollendingar.

Joustra tók undir gagnrýni á Úkraínustjórn fyrir að hafa ekki lokað lofthelginni yfir átakasvæðinu í austurhluta landsins, þar sem uppreisnarmenn, sem nutu stuðnings Rússa, börðust við stjórnarherinn og stuðningssveitir hans.

Tugir úkraínskra flugvéla höfðu verið skotnir niður yfir þessu svæði áður en malasíska farþegaþotan flaug þar yfir og var skotin niður.

Að sögn Joustra er svarið við því, hvers vegna lofthelginni hafði ekki verið lokað, bæði einfalt og dapurlegt: Enginn hafi hreinlega hugsað út í það að hugsanlega væri hættulegt að leyfa farþegaflugvélum að fljúga yfir þetta svæði.

Bæði rússneskir ráðamenn og fulltrúar uppreisnarmanna hafna niðurstöðum rannsóknarinnar. Rússlandsstjórn hefur sagt Úkraínustjórn bera ábyrgðina, og ýmist fullyrt að úkraínsk herþota hafi skotið niður malasísku farþegavélina eða sagt að flugskeytinu hafi verið skotið frá yfirráðasvæði úkraínska hersins.