Skemmtilegur tími framundan í Varmá

Það er alltaf einhver hluti veiðimanna sem náði ekki að veiða nægju sína á hverju sumri og á rólegu sumri eins og því sem er rétt liðið er þessi hópur nokkuð fjölmennur.

Sjóbirtingsveiðin er þessa dagana að ná hámarki og við erum þegar farin á stúfana til að heyra hvar veiðimenn eru helst að fá hann þessa dagana og fram að lokun veiðitímabils en það klárast í lok október.  Fyrir þá sem vilja skjótast stutt frá bænum og vera nokkuð öruggir með að vera í fiski er Varmá alltaf skemmtilegur kostur enda veiðileyfin ódýr og veiðivon góð.  Mikið hefur veiðst af stórum birting í ánni í vor og sumar ásamt því að allvænar bleikjur hafa stokkið á flugur veiðimanna.  Bleikjan er þó ekki líkleg til að vera í miklu tökustuði en annað á við um sjóbirtingin sem er að ganga í ánna þessa dagana.  Hann getur verið vænn og í sumum hyljum liggja margir vænir saman en það þýðir samt ekki að auðvelt sé að ná þeim.  Fiskurinn getur verið mjög styggur og sú veiðiaðferð sem hefur að jafnaði gefið best er að veiða andstreymis á litlar púpur eða nota litlar straumflugur.  Það er mikið af lausum leyfum í ánna í október svo það er um að gera að velja sér góða daga og klára tímabilið á einum vænum sjóbirting og ekki gleyma að segja okkur frá því.  Við hvetjum alla veiðimenn sem eru á sjóbirtingsveiðum að senda okkur mynd og segja okkur aðeins frá veiðinni.  Sendið póstinn á kalli@365.is