Nenntu ekki ofan í Bláa lónið

„Ég hef trú á að þeir séu á ákveðnum þröskuldi og gætu orðið mjög vinsælir um heim allan,“ segir rithöfundurinn Óttar M. Norðfjörð en hann stendur fyrir heimsókn spænsku hljómsveitarinnar I am Dive sem kemur fram á tónleikum hér á landi í kvöld. Um er að ræða dúett sem spilar blöndu af elektróník og rólegri popptónlist og er af mörgum talin ein áhugaverðasta hljómsveit Spánar um þessar mundir.

„Ég bý að miklu leyti á Spáni og fylgist mikið með tónlistinni þar. Ég kynntist þeim fyrir um fjórum árum og finnst þeir gera mjög spennandi hluti. Ég kynntist svo meðlimum sveitarinnar fyrir algjöra tilviljun og eftir umræður um Íslandsför eru þeir komnir hingað,“ útskýrir Óttar.

I am Dive hefur komið víða við og hefur farið í tónleikaferðalög um bæði Evrópu og Bandaríkin síðustu ár en er nú á Íslandi í fyrsta sinn. „Ég hef verið að sýna þeim helstu ferðamannastaðina en þeir nenntu ekki ofan í Bláa lónið en fannst lónið þó ákaflega fagurt og áhugavert.“

Tónleikarnir hefjast klukkan 20.30 og fara fram á skemmtistaðnum Húrra en hljómsveitin Stafrænn Hákon kemur einnig fram.

I am Dive - A Morning Walk from I am Dive on Vimeo.