Skilnaðurinn mjög sársaukafullur

Tónlistarmaðurinn Richard Marx er búinn að senda frá sér nýja plötu sem heitir Beautiful Goodbye en hann segir plötuna þó ekki fjalla um skilnað sinn við Dirty Dancing-stjörnuna Cynthiu Rhodes eins og titillinn gefur til kynna.

„Fólk hélt, sérstaklega út af nafni plötunnar, að platan fjallaði um sambandsslit. En það er misskilningur. Hún snýst frekar um að fagna rómantík og tælingu,“ segir Richard í samtali við tímaritið People. 

Richard tilkynnti að hann væri skilinn við eiginkonu sína til 25 ára í apríl síðastliðnum en hjónin höfðu verið skilin að borði og sæng síðan í júlí á síðasta ári.

„Þetta hefur verið sársaukafullur tími. En ég vil ekkert sérstaklega grafa mig í lögum um þetta af virðingu. Ég elska og virði fyrrverandi eiginkonu mína og vil ekki sökkva mér ofan í lagasmíðar. Það þýðir ekki að ég eigi aldrei eftir að gera það en ég fann að ég vildi ekki skrifa um þetta. Ég vildi skrifa um eitthvað jákvæðara,“ bætir Richard við.

Hann er hvað þekktastur fyrir ballöður á borð við Right Here Waiting og Hold On to the Nights en hann segir Beautiful Goodbye vera frábrugðna fyrri verkum.

„Þessi nýju lög eru meira um kynlíf. Það var gaman að skrifa um það. Það er eitthvað dularfullt við dans á milli tveggja einstaklinga, sérstaklega á frumstigum hugsanlegs ástarsambands þegar fólk fer í hring um hvort annað og reynir að átta sig á hvert öðru,“ segir Richard.