De la Hoya og Mayweather vilja kaupa Clippers

Það stefnir í harða baráttu um eignarhaldið á LA Clippers eftir að eigandi félagsins, Donald Sterling, fékk lífstíðarbann frá deildinni í gær.

Þegar hefur verið greint frá áhuga Magic Johnson á félaginu og nú eru hnefaleikakapparnir Oscar de la Hoya og Floyd Mayweather að skoða kaup á Clippers.

"Deildin vill að fleiri minnihlutahópar fái að taka þátt og ég sem stoltur Bandaríkjamaður frá Mexíkó myndi koma með nýja nálgun í deildina," sagði Oscar de la Hoya en hann lagði hanskana á hilluna fyrir nokkru. Hann er nú skipuleggjandi hnefaleika og með þeim stærri.

"Ég er fæddur og uppalinn í Los Angeles. Ég veit hvað þarf til að ná árangri í íþróttum og hvernig á að reka íþróttafyrirtæki. Fátt myndi gera mig ánægðari en að koma með NBA-titilinn til LA."

Bæði De la Hoya og Mayweather hafa orðið moldríkir af þáttöku sinni í hnefaleikaheiminum en Mayweather er launahæsti íþróttamaður heims í dag.