Nýtt myndband frá Önnu Hlín

Söngkonan Anna Hlín hefur sent frá sér nýtt myndband við lagið Everybody´s saying en hún er búsett í Noregi um þessar mundir og á í nógu að snúast.

„Ég bý í Noregi núna og á og rek mitt eigið tónlistarhús, sem samanstendur af þjónustu við tónlistarfólk alls staðar úr heiminum.  Við tengjum saman tónlistarfólk við söngvara, lagahöfunda og svo framvegis. Til dæmis ef að tónlistarmaður hefur samband vid okkur og er með lag, sem vantar texta við lagið, fáum við upplýsingar frá honum eftir því hverju hann er að leita eftir og tengjum hann við textahöfund við hæfi, fyrir smá gjald,“ útskýrir Anna Hlín.

Hún, ásamt eiginmanni sínum, Anthony Lewis eru líka með þjónustu við ýmis fyrirtæki og semja til að mynda auglýsingastef og byrjunarstef fyrir þætti og útvarpsþætti.

Anna Hlín vinnur nú hörðum höndum við gerð plötu og stefnir á að gefa út nýja plötu á næsta ári. Þá er nóg að gera hjá henni í að koma fram í Noregi.

„Við ætlum að reyna að koma þessu nýja myndbandi fyrir á MTV Norge sem væri mjög stór stökkpallur,“ bætir Anna Hlín við.

Myndbandið er unnið af framleiðslufyrirtækinu Silent. Lagið er eftir þýska pródúsentinn Teka og textinn eftir Brynju Sigurðardóttur. Þá sá eiginmaður Önnu, Anthony Lewis um hljóðblöndun og Sean Chase. Sniteville sá um masteringu lagsins.