George Clooney kemur á óvart

Bandaríski leikarinn og hjartaknúsarinn George Clooney fór á skeljarnar fyrir skömmu, ef marka má erlenda miðla. Samkvæmt People Magazine hefur hann trúlofast breska lögfræðingnum Amal Alamuddin.

Clooney, sem er 52 ára gamall hefur löngum verið þekktur fyrir að vera einn heitasti piparsveinn heimsins en hann og Alamuddin sem er 36 ára gömul byrjuðu að stinga saman nefjum í októbermánuði.

Til þeirra sást á veitingastað í Los Angeles fyrir skömmu og samkvæmt erlendum miðlum bar Alamuddin þar stærðarinnar hring á fingri.

Clooney hefur einu sinni gengið í það heilaga, en eftir að hann skildi árið 1993 hefur hann verið einn vinsælasti piparsveinn heims.