Hugsanlegt að vöruskorts verði vart í upphafi nýs árs

„Þetta er enn ein birtingarmynd þess að innflytjendur sitja ekki við sama borð og framleiðendur á Íslandi,“ segir Magnús Óli Ólafsson, forstjóri heildverslunarinnar Innness, um vörugjöldin sem verða afnumin 1. janúar 2015.

Innflytjendur telja að með gildistökuákvæðum laganna sé þeim mismunað þar sem innflytjendum sé gert að greiða vörugjöldin við tollafgreiðslu vara en innlendir framleiðendur standi skil á gjöldunum eftir að hún er seld. Þannig munu vörur sem fluttar eru inn fyrir áramótin af innflytjendum en seldar eftir þau þurfa að bera vörugjöld en ekki hjá framleiðendum.

„Með þessu er verið að mismuna erlendum framleiðendum miðað við íslenska framleiðendur. Það er spurning hvort innflutningsverslunin eigi að leita réttar síns varðandi þetta,“ segir Magnús Óli.

Ólafur Stephensen, framkvæmdastjóri Félags atvinnurekenda, segir möguleika á því að einhver vöruskortur verði vegna þessa.

„Menn eru búnir að flytja eins lítið inn og þeir komast af með fyrir áramót. Hjá aðildarfyrirtækjum Félags atvinnurekenda hafa menn sagt að þetta geti þýtt að dagana fyrir og eftir áramót geti orðið einhver skortur á þeim vörum sem bera vörugjöld,“ segir Ólafur og nefnir sem dæmi af matvöru sósur, sultur, kökur og kex, sælgæti, gos, safa og aðrar sykraðar vörur.

Félag atvinnurekenda lagði það til við stjórnvöld að vörugjald sem greitt hefði verið við tollafgreiðslu yrði endurgreitt þeim innflytjendum sem ættu vörur á lager um áramót. Á það var ekki hlustað.

„Þetta þýðir líka að fyrst gildistökuákvæðunum var hagað svona þá getur vörugjaldið verið áfram í verði varanna í þrjár til fjórar vikur eftir áramótin. Verðlækkunin skilar sér ekki strax til neytenda,“ segir Ólafur.

Almenn vörugjöld leggjast í dag og til áramóta á sykruð matvæli og drykkjarvörur, byggingavörur, varahluti í bíla, stærri heimilistæki svo sem ísskápa og þvottavélar auk annarra raftækja eins og sjónvarpa og hljómflutningstækja.