„Shit happens“

Það eru liðin tvö ár síðan stórleikararnir og Twilight-stjörnurnar Robert Pattinson og Kristen Stewart hættu saman en í nýlegu viðtali við tímaritið Esquire opnar Pattinson sig í fyrsta sinn um sambandsslitin.

„Shit happens,“ sagði ungi leikarinn í viðtalinu. „Þetta er bara svona með ungt fólk, og það er fullkomlega eðlilegt, svona í alvörunni, hverjum er ekki drullusama?“ er meðal þess sem Pattinson sagði í viðtalinu sem er vægast sagt áhugavert.

Leikarinn játar einnig að eiga enn þá erfitt með að tala um sambandsslitin.

„Þegar þú talar um einhvern án þess að hún viti af því þá hefur það alltaf áhrif á þá manneskju sem þú getur ekki séð fyrir.“

Pattinson er aðeins 28 ára gamall en honum skaut upp á stjörnuhimininn eftir geysivinsælu Twilight-myndirnar en hann var umtalaður fyrir að vera myndarlegur.

Þrátt fyrir það hefur hann aldrei skilið áhuga fólks á einkalífi hans og segist vera orðinn mjög þreyttur á ljósmyndurum sem elta hann út um allt.

„Ég lét stundum aðstoðarmann minn dulbúa sig sem mig og lét hann keyra um með svona fimm bíla á eftir sér í einhverja klukkutíma,“ játar Pattinson í viðtalinu.