Íslenska flothettan í útrás

„Þetta er alveg búið að slá í gegn, bæði hér á landi og erlendis, en flothettan er farin að seljast út um allar trissur,“ segir Guðrún Kristjánsdóttir, annar eigandi Systrasamlagsins, um hina íslensku Flothettu.

Flothettan var hönnuð af Unni Valdísi Kristjánsdóttur vöruhönnuði fyrir nokkrum árum og var innblásin af vatnsauðlegð þjóðarinnar. Undanfarið hefur notkun hennar færst í aukana og sundlaugar landsins eru nokkrar hverjar farnar að bjóða upp á leigu á hettum.

„Það má segja að þetta sé íslenska leiðin til að hugleiða en með flothettunni er megináhersla lögð á slökun og ró. Við vildum fara með þetta upp í laug og leyfa almenningi að prófa að fljóta með okkur,“ segir Guðrún en undanfarið hafa þær systur hjá Systrasamlaginu staðið fyrir svokölluðu samfloti í Neslauginni. Hún segir náttúrulaugarnar víða um land kjörnar fyrir flotið.

„Gamla laugin við Flúðir er alveg yndisleg og það er eins og hún sé hönnuð fyrir flot. Ég hugsa einmitt að það verði yndislegt að fara þangað í vetur og fljóta í skammdeginu og fá snjóinn í andlitið eða fylgjast með norðurljósunum.“

Flothettan hefur vakið þó nokkra athygli erlendis og segir Guðrún hana vera í eins konar útrás. 

„Umfjöllun á erlendum síðum hefur kveikt áhugann og nú er það svo að Flothettan er nánast komin út um allt, til Bretlands, Kanada, Portúgal, Frakklands, Indlands og meira að segja til Hollywood.“ 

Guðrún segir að næsta samflot þeirra systra verði í Neslauginni hinn 17. ágúst kl. 9 og hvetur hún þá sem vilja prófa að taka þátt.