Ætla að hreyfa sig í öllum veðrum alltaf

„Þetta er æfingahópur sem er opinn öllum og við æfum á morgnana í Reykjavík,“ segir Rakel Eva Sævarsdóttir íþróttakona. Hún stýrir æfingahópi sem er nýr af nálinni og kallast hópurinn Áform.

„Ég er nýkomin frá Cambridge í Massachusetts þar sem ég tók þátt í íþróttahópi undir yfirskriftinni November Project og má segja að það sem ég sé að gera sé í líkingu við það sem ég kynntist úti,“ segir Rakel Eva.

Hópurinn sem Rakel Eva var í, var stofnaður af tveimur félögum hennar þegar hún var við nám í Cambridge, fyrir um tveimur árum. „Þeir félagar vildu finna sér leið til þess að halda sér í formi allt árið um kring, fyrir engan pening og hafa líka gaman,“ bætir Rakel Eva við.

November Project er nú í sautján borgum í Bandaríkjunum og í Kanada. „Eftir að hafa verið í November Project í smá tíma gat ég hlaupið Boston-maraþonið.“

Hún segir að ekki sé hægt að líkja umræddum íþróttahópi við crossfit eða því um líkt. „Þetta er og verður alltaf frítt. Eina skilyrðið fyrir fólk til þess að mæta er bara að það hafi áhuga á að hreyfa sig, formið skiptir ekki máli. Ég held bara utan um hópinn og vil fá alls konar fólk til að mæta.“

Hópurinn hittist síðast í gær og æfði í tröppunum fyrir framan aðalbyggingu Háskóla Íslands en þetta var í þriðja sinn sem að hópurinn hennar Rakelar Evu hittist.

Hún ætlar ekki að láta íslenska veðurfarið hafa áhrif á íþróttaiðkunina og ætlar að æfa í öllum veðrum. „Ég ætla ekki að láta veðrið hafa nein áhrif. Við æfðum í öllum veðrum í Bandaríkjunum, þó það hafi verið tuttugu stiga frost. Fólk klæðir sig bara vel og hefur gaman,“ segir Rakel Eva og hlær.

Þeir sem vilja komast í æfingahóp Rakelar Evu, geta haft samband í gegnum facebook síðu undir nafninu, Áform og þar er hægt að nálgast upplýsingar.

Örlítið um November Project

Um er að ræða íþróttahóp sem Brogan Graham og Bojan Mandaric stofnuðu í Boston árið 2011.

Þeir vildu finna leið til þess að halda sér í formi allt árið um kring, fyrir engan pening og hafa líka gaman af.

November Project hópar eru nú starfræktir í sautján borgum í Bandaríkjunum og Kanada.

Hóparnir fara af stað klukkan 6.30 á morgnanna og eru hundruðir manna sem sprikla í November Project-hópum á mismunandi stöðum. Æfingarnar eru í þrjátíu til fjörtíu mínútur í senn.

Alls kyns æfingar eru iðkaðar eins og ýmis hlaup, styrktaræfingar eins og armbeygjur, Burpees og ýmislegt annað.