Þurfum sjálfboðaliða inn í daglega starfsemi

„Ég þekki ágætlega til hérna. Hef verið starfsmaður Reykjavíkurdeildarinnar í fimm ár en er búinn að vera sjálfboðaliði Rauða krossins í hinum ýmsu verkefnum og stjórnarstörfum síðan 1991,“ segir Þór Gíslason sem nýlega var ráðinn framkvæmdastjóri Reykjavíkurdeildar Rauða krossins.

Upphaflega var það auglýsing í blaði sem dró Þór að samtökunum.

„Ég sá auglýst eftir fólki sem væri áhugasamt um að koma að stofnun símaþjónustu fyrir fólk í vanda sem síðar varð Vinalínan. Ég var einn af þeim sem vann forvinnuna og startaði henni. Ætla ekki að eigna mér hana en ég starfaði við hana um tíma og hef ekki náð að slíta mig frá Rauða krossinum síðan.“

Í ungmennastarfinu var Þór líka virkur í Rauðakrosshúsinu í Lækjargötunni og miðbæjarstarfi en mest kveðst hann þó hafa unnið í Húsavíkurdeildinni og sem stjórnarmaður í Rauða krossi Íslands.

„Ég hef líka verið í samstarfi með Rauða krossinum erlendis, hélt til dæmis utan um verkefni Rauða krossins í Reykjavík í Gambíu. Fór í heimsókn til Gambíu en verkefnið var rekið héðan,“ lýsir hann.

Þór er menntaður M.Sc. í verkefnastjórnun frá Háskóla Íslands og með BA-gráðu í heimspeki, hagfræði og stjórnmálafræði frá Háskólanum á Bifröst. Býst hann við að gera einhverjar breytingar á starfsemi Reykjavíkurdeildarinnar nú þegar hann er orðinn framkvæmdastjóri?

„Eflaust verða einhverjar breytingar á starfsháttum. En mín störf og annarra starfsmanna deildarinnar snúast um að framfylgja stefnu stjórnarinnar sem er skipuð sjálfboðaliðum.“

Þór kveðst hafa hug á að efla sjálfboðastarfið.

„Rauði krossinn á langa og mikla hefð í sjálfboðastörfum við hin ýmsu verkefni og stjórnun hér á landi en við þurfum að fá sjálfboðaliða inn í daglega starfsemi hreyfingarinnar í meiri mæli en nú er. Þannig er það víða erlendis.“