Einn dáðasti leikari sinnar kynslóðar

Fregnir herma að Philip Seymour Hoffman hafi látist úr of stórum skammti eiturlyfja á sunnudaginn, en rannsakendur á vettvangi fundu sprautu í handlegg hans, og umslag með efni sem virtist vera heróín.

Hoffman hafði um árabil átt við fíknivanda að etja. Árið 2006 sagði hann í viðtali í fréttaskýringaþættinum 60 minutes að hann hefði hætt að neyta áfengis og fíkniefna mörgum árum áður, eða þegar hann var 22 ára gamall. Á síðasta ári fór leikarinn góðkunni þó í meðferð í um það bil tíu daga eftir að hann ánetjaðist lyfseðilsskyldum lyfjum sem leiddi síðar til þess að hann fór aftur að nota heróín.

Philip Seymour Hoffman hefur unnið leiksigra á ferlinum. Hann vann mikið með leikstjóranum, handritshöfundinum og framleiðandanum Paul Thomas Anderson í myndum á borð við The Master, Magnolia og Boogie Nights, hann hlaut Óskarsverðlaunin fyrir leik sinn í Capote, mynd byggð á ævi rithöfundarins Truman Capote og vakti eftirtekt í hlutverki sínu í kvikmyndinni Happiness, í leikstjórn Todd Solondz, þar sem hann lék hinn pervisna og einkar ógeðfellda Allen.

Þá þótti hann skara fram úr í hlutverki CIA fulltrúans Gust Avrakotos í kvikmyndinni The Talented Mr. Ripley, og svo mætti lengi telja. Þannig bætist Hoffman í hóp þeirra hæfileikaríku listamanna sem deyja fyrir aldur fram.

Hoffman var í sambandi með búningahönnuðinum Mimi O‘Donnell síðustu fimmtán ár ævi sinnar. Þau kynntust þegar þau unnu að leikverkinu In Arabia We‘d All be Kings sem Hoffman leikstýrði, árið 1999. Þau eignuðust son, Cooper, árið 2003 og tvær dætur, Tallulah, fædd 2006 og Willa, fædd 2008.

Í minningargrein í New York Times var Hoffman lýst sem þybbnum, þreytulegum manni með ljóst, og gjarnan ógreitt hár. Í minningargreininni sagði enn fremur að Hoffman væri þekktur fyrir að klæðast krumpuðum fötum sem menn tengdu frekar við atvinnulausan leikara heldur en stjörnu. Hann breytti gjarnan útliti sínu fyrir hlutverk sem hann tók að sér, breytti um hárlit og þyngdi sig eða létti. Hann var þekktur fyrir að helga sig hlutverkum sínum algjörlega, stundum óþarflega mikið.

Hoffman lék í myndum á borð við Scent of a Woman (1992),Twister (1996), Boogie Nights (1997), The Big Lebowski (1998), Patch Adams (1998), Magnolia (1999), The Talented Mr. Ripley (1999), Almost Famous (2000), Red Dragon (2002), 25th Hour (2002), Punch-Drunk Love (2002) og Cold Mountain (2003)

2005 lék Hoffman titilhlutverkið í Capote. Aðrar myndir sem hlutu lof gagnrýnenda voru Owning Mahowny (2003), Before the Devil Knows You‘re Dead (2007), Charlie Wilsons‘s War (2007),The Savages (2007), Synecdoche, New York (2008), Doubt (2008), Moneyball (2011), The Ides of March (2011) og The Master (2012). Árið 2010, leikstýrði hann sinni fyrstu kvikmynd, Jack Goes Boating.

Philip Seymour Hoffman var dáður í leikhúsi, bæði sem leikari og leikstjóri, en hann kom fram í og leikstýrði mörgum verkum á ferlinum.

Hann hlaut þrjár tilnefningar til Tony-verðlauna, tvær fyrir besta leik í aðalhlutverki í verkunum True West (2000) og Death of a Salesman (2012), og eina fyrir besta leik í aukahlutverki í Long Day‘s Journey into Night (2003).