Hægt að vinna stór og mikil verk á skömmum tíma

„Ríkið lagði fram hugmyndir í gærkvöldi og þær erum við að skoða. Það er mjög gott að samningsaðilar eru byrjaðir að skiptast á pappírum því það byrjaði eiginlega ekki fyrr en í gær,“ segir Aðalheiður Steingrímsdóttir, formaður félags framhaldsskólakennara, í viðtali á þættinum í Bítið á Bylgjunni nú í morgun.

Um 1900 kennarar og stjórnendur skóla eru nú frá vinnu vegna verkfalls sem hefur áhrif á um 20 þúsund nemendur.

Enn ber mikið á milli samningsaðila að sögn Aðalheiðar en það er ekki búið að slíta viðræðum. Áfrom séu nota tímann vel og það verður fundur í dag. Fram kom að ríkið hefði boðið meira en 2,8 prósenta hækkun á launum.

Framhaldsskólakennarar eru með með tvær meginkröfur. Í fyrsta lagi að launin verði leiðrétt þannig  að laun í framhaldsskólum verði sambærileg við aðra háskólamenntaða starfsmenn ríkisins. „Munurinn á dagvinnu kennara og annarra skyldra hópa eru 17 prósent og þetta þarf að laga,“ segir Aðalheiður. 

„Hin megin krafan er að það verði settir meiri fjármunir í skólastarfið til að bæta nám nemenda og starfs skólanna og reisa innra starfið á fæturna,“ segir Aðalheiður.

Tvær meginkröfur

„Við erum búin að sitja yfir þessu síðan 3. desember,“ segir Aðalheiður. Það hafi ekki verið fyrr en í byrjun febrúar að kraftur hljóp í viðræðurnar. Þá í fyrsta skipti treysti samninganefnd ríkisins sér að ræða um kennarasamninga en ekki þessa almennu samninga sem voru gerðir á vinnumarkaðnum. Síðan þá hafi efnislegar samræður farið fram um þessar tvær meginkröfur og um það að aðlaga kjarasamninga að lögum um skólastigið.

Lögin voru sett 2008 en stór hluti þeirra hafi ekki komist til framkvæmda meðal annars vegna efnahagshrunsins.  Lögin segja til dæmis að það eigi að lengja skólaárið, fella niður skilin milli kennslu- og prófatíma. Lögin eiga að taka gildi að fullu eftir eitt ár. „Þannig að það er ekki seinna vænna að fara að fást við þetta,“ segir Aðalheiður. „Samningsaðilar hafa verið að ýta þessu á verkefni á undan sér lengi.“

Aðalheiður telur að vinnubrögðin í ferlinu séu eðlileg. Frá því að hún tók við starfi formanns árið 2005 hafi efnislegar samningaviðræður alltaf hafist of seint, það sé líka þannig núna. Betra hefði verið að sitja yfir þessu efnislega frá 3. desember. Dýrmætur tími hafi farið til spillis.

Óþolandi að þurfa að fara í aðgerðir til að pressa á kröfur

Verkfallsboðunin hafi auðvitað ýtt við samninganefnd ríkisins og það sé óþolandi að kennarar og stjórnendur hafi alltaf með reglubundnu millibili verið settir í þá stöðu að þurfa að fara í aðgerðir til þess að pressa á sínar kröfur. Vinnubrögðin ættu auðvitað að vera þannig hinum megin frá að aðilar komi vel undirbúnir til samningaviðræðna.

Samtök atvinnulífsins sendu frá sér fréttatilkynningu þar sem fram kemur að þeim finnist krafa kennara ekki nógu vel rökstudd og laun hefðu almennt dregist aftur úr á vinnumarkaði. Þar kom fram það væri ósanngjarnt að kennarar færu fram með þessum hætti þegar verið væri að ná fram einhverju jafnræði.

„Við erum búin að vera með þetta markmið í kjarasamningum frá árinu 2000 að laun í framhaldsskólum þróuðust með sambærilegum hætti,“ segir Aðalheiður. Mjög skýrar tölur liggi fyrir um slakari launaþróun hjá kennurum en öðum sambærilegum hópum. Launasig kennara komi mjög vel í ljós og miklu slakari kaupmáttarþróun.

„Fyrst að stórgreifarnir eru farnir að tjá sig um mál annarra, sem þeir eiga að láta gera ógert, þá hlýtur að mega gera sömu kröfur til þeirra um að þeir rökstyðji fyrir þjóðinni hvers vegna þeir eru á allt öðrum launakjörum en almenningur í landinu býr við,“ segi Aðalheiður.

Verkfall dýrt fyrir samfélagið

Aðspurð svarar Aðalheiður því að hún eigi von á því að þetta verið leysist fljótt. Hægt sé að gera mikil og stór verk á skömmum tíma og þau leggi áherslu á að hver dagur verði nýttur til hins ýtrasta. Verkfallið sé dýrt fyrir nemendur, starfsmenn skólanna og samfélagið allt.

Kennarar fá greiddar sex þúsund krónur á dag úr verkfallssjóði að sögn Aðalheiðar.