Alvarlegt mál sem á sér fá fordæmi

Málflutningur í máli sérstaks saksóknara á hendur fyrrverandi stjórnendum Landsbankans vegna meintra umboðssvika fer nú fram í Héraðsdómi Reykjavíkur.

Ákæruvaldið segir stjórnendurna, þau Sigurjón Þorvald Árnason og Elínu Sigfúsdóttur, hafa brotið gróflega af sér og segir fá fordæmi um umfang og alvarleika málsins. Þó sé hægt að líkja málinu við Exeter málið svokallaða þar sem stjórnendur sparisjóðsins Byrs voru dæmdir í fjögurra og hálfs árs fangelsi. Brot Sigurjóns og Elínar gætu varðað við sex ára fangelsi. 

Lánareglur þverbrotnar

„Lánareglur Landsbankans voru þverbrotnar með veitingu sjálfskuldarábyrgðar. Þau fóru út fyrir þær heimildir sem þau höfðu til sjálfskuldarábyrðar og þar með misnotuðu þau aðstæður sínar gróflega,“ sagði Ásmunda Björg Baldursdóttir, saksóknarfulltrúi sérstaks saksóknara í munnlegum málflutningi í Héraðsdómi Reykjavíkur í dag.

Sigurjón og Elín eru ákærð fyrir fyrir umboðssvik upp á samtals 13,6 milljarða króna sem sneri að aflandsfélögunum Empennage Inc og Zimham Corp sem voru í eigu bankans. Féð var lánað vegna kaupréttarsamninga starfsmanna. 

Ekkert áhættumat

Ákæruvaldið telur að með veitingu sjálfskuldarábyrgðanna á lánasamningum félaganna við Kaupþing, sem afgreiddar voru á milli funda lánanefndar og án utanaðkomandi trygginga, hafi þau brotið lánareglur bankans. Sigurjón og Elín bentu þó á á mánudag að undirliggjandi trygging hefði legið fyrir og algengt væri að afgreiða mál á milli funda. Um sex hundruð slíkir fundir hefðu átt sér stað á þessu tímabili.

Ásmunda gagnrýndi harðlega áhættumat félaganna en voru þau metin sem svo að lítil sem engin áhætta fylgdi því að lána félögunum. Þuldi hún upp tæmandi lista yfir þau skilyrði sem fyrirtæki þurfa að uppfylla til þess að hægt sé að meta þau áhættulítil. Þar segir meðal annars að fyrirtæki þurfi að vera með trausta viðskipta- og fjárhagssögu og góða greiðslugetu.

„Félögin uppfylla ekkert þessara skilyrða. Hér er um að ræða nýstofnuð skúffufélög með hundrað prósenta lánsfjármögnun. Það virðist ekkert áhættumat hafa farið fram á veitingu sjálfskuldarábyrgða,“ sagði Ásmunda.

Sem fyrr segir neita bæði Sigurjón og Elín sök í málinu. Telja þau að með veitingu sjálfskuldarábyrgðanna hafi þau dregið umtalsvert úr áhættu bankans og ávinningurinn hafi verið um 10 milljarðar um mitt ár 2006 og 35 milljarðar um mitt ár 2007.

Málflutningur stendur nú yfir í Héraðsdómi Reykjavíkur.