Segir ríkisstjórnina taka málstað einræðisherra og drullusokka

Árni Páll Árnason, formaður Samfylkingarinnar, var gestur í þættinum Harmageddon á X-inu í morgun og ræddi hann meðal annars um Evrópumálin og orð Gunnars Braga Sveinssonar, utanríkisráðherra, á þinginu í vikunni þegar hann leiddi líkur að því að ástandið í Úkraínu mætti rekja til aðgerða Evrópusambandsins.

„Gunnar Bragi talaði  um að Evrópusambandið bæri ábyrgð á ástandinu í Úkraínu sem er með ólíkindum. Einu mennirnir sem halda þessu fram á alþjóða vettvangi eru Pútín Rússlandsforseti, og sendisveinar hans. Það er ótrúlegt að sjá íslenska ráðamenn vera komna svo langt frá Norðurlöndunum í hugsun að þeir haldi svona fram. Ef ríkisstjórnin er orðin svona skökk í hausnum að hún taki málsstað einræðisherra og drullusokka vítt og breitt um heiminn frekar en að standa með okkar nágrannaþjóðum og skynja hvað þær eru að hugsa, þá erum við í vondum málum,“ sagði Árni Páll í morgun.

Árni Páll segir að Framsóknarflokkurinn tali einungis fyrir hagsmunahópum sem græða á því að lifa í höftum.

„Evrópumálin eru fyrst og fremst ekki sérmál Samfylkingarinnar heldur miklu stærra mál sem varðar alla þjóðina,“ sagði Árni Páll.

Evrópuskýrsla Hagfræðistofnunar Háskóla Íslands kom út í vikunni og segir Árni Páll að það komi hvergi fram í skýrslunni að nauðsynlegt sé að hætta viðræðum. Hann segir að ríkisstjórnin kjósi að túlka skýrsluna á þann veg að það sé óhjákvæmilegt að loka þessum dyrum.

„Þetta mál snýst um umgjörð Íslands og hvernig við ætlum að vera með sambærileg kjör með öðrum þjóðum. Nýju sprotafyrirtækin í dag eru nánast öll skráð annarsstaðar en á Íslandi. Framsóknarmönnum tókst fyrir síðustu kosningar að láta umræður snúast um eitthvað allt annað en þessi grundvallaratriði. Við sitjum eftir núna með EES samning sem er ekki að virka og erum við enn í höftum. Ef ríkisstjórnin ætlar að loka þessum dyrum án þess að vera með aðrar jafn góðar opnar fyrir íslenska hagsmuni, þá er hún að vinna gegn þjóðarhagsmunum.“

Árna Páli fannst ræða utanríkisráðherra í vikunni vægast sagt athyglisverð.

Sérstaklega valið til að valda hámarks tjóni

„Ég gat ekki betur séð en að orðavalið sem var notað í þeirri ræðu hafi verið sérstaklega valið til þess að valda hámarks tjóni og þar sagði Gunnar Bragi hluti sem voru svo ótrúlegir að maður bara hristir hausinn.“

Formaður Samfylkingarinnar gagnrýndi einnig orð Sigmundar Davíðs Gunnlaugssonar, forsætisráðherra, í síðustu viku.

„Hann úthúðaði Lífeyrissjóðunum fyrir það að vera fjárfesta í fyrirtækum því þau eru að keppa við vini hans og grafa undan hans valdastöðu og hans vina. Hann úthúðar Seðlabanka Íslands því hann tekur sjálfstæðar ákvarðanir, það má enginn taka sjálfstæðar ákvarðanir. Hann úthúðar einnig forystumönnum í atvinnulífinu því þeir vilja opna landið. Við sem þjóð höfum aðra hagsmuni heldur en einhver lítil forréttindaklíka í kringum forystu Framsóknarflokksins.“

Ekkert segir í skýrslunni um að slíta viðræðunum

Árni segir það vera alveg ljóst að það standi í skýrslunni að ferlið hafi verið stöðvað of snemma og það hafi ekki fengist svör við því hvað okkur býðst.

„Eina leiðin til að leysa þann vanda er að halda áfram með viðræðurnar. Ég trúi því samt ekki fyrir en ég tek á því að aðildarviðræðunum verði strax slitið í næstu viku. Ríkisstjórnin hefur ekkert umboð til að slíta þessum viðræðum nema með aðkomu þingsins. Samfylkingin ber auðvitað ábyrgð á því að ná ekki að mynda nægilega mikla samstöðu um Evrópumálin á síðasta kjörtímabili. Síðasta kjörtímabil einkenndist af miklum átökum og það var ákveðið vandamál. Þetta veitir samt engum öðrum heimild fyrir því að skemma þetta ferli.“