Fyrsta spil sinnar tegundar

„Mesta snilldin við þetta er líklega sú að þú getur hamast í þessu hvar og hvenær sem er,“ segir Arnaldur Birgir Konráðsson, framkvæmdastjóri Boot Camp, en félagið hefur sent frá sér fyrsta spil sinnar tegundar hér á landi sem fær fólk til að hreyfa sig.

Um er að ræða spila með hreyfingu sem félagið notar í æfingum sínum. „Við höfum búið til spil en þá bara fyrir okkar fólk en vegna mikillar eftirspurnar ákváðum við að kýla á spil fyrir almenning. Þetta er gott fjölskylduspil og svo getur þetta líka verið gott keppnisspil,“ segir Arnaldur Birgir.

Æfingarnar í spilinu krefjast ekki hjálpartækja eða annarra tóla því hægt er að gera þær hvar sem er. „Æfingarnar okkar í Boot Camp eru þannig að fólk vinnur með sína eigin líkamsþyngd og þarfnast ekki hjálpartækja og þannig er þetta í spilinu.“

Spilið skiptist í tvennt, annars vegar borðspil og spilastokk, en á hverju spili í spilastokknum er æfing. „Við breyttum þekktum spilaleikjum eins og Olsen Olsen og Veiðimanni í æfingaspil, þá getur fólkið búið sér til ýmsa leiki í kringum spilið. Ég hef líka fengið fyrirspurnir um hvað sé hægt að gera í sumarfríinu og er spilið mjög hentugt fyrir þá sem vilja halda sér í formi í sumar,“ segir Arnaldur Birgir og hlær.