Missir ekki af Þjóðhátíð ótilneyddur

„Ég fór fyrst á Þjóðhátíð árið 1986 og hef bara einu sinni misst af Þjóðhátíð síðan þá en það var árið 2008, enda hef ég heyrt að sú Þjóðhátíð hafi verið afleit,“ segir hinn 43 ára gamli Marteinn Sveinsson en hann er mikill Þjóðhátíðarunnandi. Hann er þó ekki úr Eyjum heldur er hann frá Reykjavík. „Þetta er bara orðið að hefð sem má ekki breyta.“

Hann man vel eftir hátíðinni 1986. „Þetta var stór Þjóðhátíð og það voru um tólf þúsund manns þarna, Stuðmenn og Geirmundur héldu manni í góðu stuðið,“ segir Marteinn og hlær.

Þjóðhátíðin hefur breyst með árunum og er til dæmis komið nýtt og glæsilegt aðalsvið í Dalinn. „Þetta er allt mjög svipað en hefur auðvitað stækkað undanfarin ár. Mér þykir þetta nýja svið mjög glæsilegt og er ánægður með það,“ bætir Marteinn við.Hann segir þó að minna beri á áfengisdauðu fólki á seinni árum. „Maður sér mun á fólkinu, fyrst var fólk meira áfengisdautt, það var víða sem fólk lá áfengisdautt en gæslan hefur líka orðið betri með árunum sem lagar svona hluti,“ segir Marteinn.

Hann lætur lítið stoppa sig og hefur ekki alltaf farið til Eyja í fullkomnu standi. „Árið 1993, tíu dögum fyrir Þjóðhátíð, lenti ég í bílslysi en lét það ekki á mig fá. Ég fór með 60 spor í hausnum og þrjá hryggjarliði brotna en dreif mig samt.“ Af þessum 29 skiptum hefur hann bara tvisvar sinnum verið í tjaldi. „Ég fer yfirleitt með hjólhýsi eða sendibíl sem ég set sófa eða rúm inn í.“ Marteinn ætlar að sjálfsögðu ekki að láta sig vanta í Herjólfsdal í ár.