Adam Lallana genginn til liðs við Liverpool

Liverpool staðfesti rétt í þessu að félagið hefði gengið frá kaupunum á Adam Lallana frá Southampton. Lallana sem er 26 ára miðjumaður skrifaði undir hjá Liverpool í morgun eftir að hafa staðist læknisskoðun.

Lallana sem hefur leikið með Southampton undanfarin ár hefur verið orðaður við Liverpool allt frá því að síðasta leiktímabil kláraðist. Lallana hefur átt stóran þátt í ótrúlegu uppgengi Southampton undanfarin ár en hann hafði verið hjá félaginu allt frá árinu 2000 en hann lék alls 265 leiki í treyju Southampton.

Talið er að Liverpool greiði Southampton 23 milljónir punda fyrir Lallana ásamt því að 2 milljónir verði árangurstengdar. Hjá Liverpool hittir hann fyrrum liðsfélaga sinn hjá Southampton, Rickie Lambert sem gekk til liðs við Liverpool fyrr í sumar.