Hvert metið fellur á fætur öðru

Fjölmörg met hafa nú verið slegin varðandi millilandaflug í sumar. Gífurleg aukning farþega og fluga hefur kallað á mikil umsvif Isavia og dótturfélögum. Þá sérstaklega á Keflavíkurflugvelli og í flugstjórnarmiðstöðinni í Reykjavík.

Í tilkynningu frá Isavia segir að farþegafjöldi á Keflavíkurflugvelli hafi í fyrsta sinn farið yfir 500 þúsund í einum mánuð í júlí. Fjöldinn jókst um 17,8 prósent frá júlí í fyrra. Þá segir að það sem af sé árinu hafi hátt í 2,2 milljónir farþega farið um flugvöllinn, eða 20,2 prósent fleiri en 2013.

Þá var einnig slegið met í íslenska flugstjórnarsvæðinu. 14.548 flugvélum var flogið í gegnum flugstjórnarsvæði Íslands og mest 612 á einum sólarhring. Það er mesta umferð sem sést hefur að undanskildum maímánuði 2010. Þá fór megnið af allri umferð um Norður-Atlantshaf um svæðið vegna eldgossins í Eyjafjallajökli.

Í tilkynningunni segir að starfsmenn Isavia hafi verið alls 1.135 í sumar í 1.056 stöðugildum og er það 6,5 prósent aukning frá því í fyrra. Meðalfjöldi starfsmanna utan háannatíma eru að jafnaði 884 í 791 stöðugildum. Sumarstarfsmenn eru alls 283 og langflestir í Keflavík eða alls 254.