Metfjöldi farþega hjá Icelandair í júlí

Í júlí flutti Icelandair 355 þúsund farþega í millilandaflugi og voru þeir 16% fleiri en í júlí á síðasta ári. Þetta er mesti farþegafjöldi í einum mánuði frá stofnun félagsins. Í tilkynningu frá félaginu kemur fram að þetta er einnig í fyrsta sinn sem félagið flytur í einum mánuði fleiri farþega en sem nemur íbúatölu Íslands. Framboðsaukning á milli ára nam 19% og var sætanýting 85,9%, samanborið við 86,1 á sama tíma í fyrra.

Jafnframt segir að farþegar í innanlandsflugi og Grænlandsflugi hafi verið rúmlega 32 þúsund í júlí. Framboð félagsins hafi verið aukið um 4% samanborið við júlí 2013. Sætanýting nam 72,2% og dróst saman um 1,5% á milli ára. Seldum blokktímum í leiguflugi fækkaði um 26% á milli ára. Fraktflutningar jukust um 9% frá því á síðasta ári. Fjöldi seldra gistinótta á hótelum var svipaður á milli ára og var herbergjanýting 89,1% samanborið við 89,2% í júlí í fyrra.