Peaches Geldof látin

Sjónvarpskonan Peaches Geldof, dóttir tónlistarmannsins Bob Geldof og Paula Yates, er látin, 25 ára að aldri. BBC segir frá þessu.

Lögreglan var kölluð að húsi nálægt Wortham í Kent í Bretlandi síðdegis í dag og var Peaches úrskurðuð látin stuttu síðar. Á þessu stigi er dánarorsök hennar ekki ljós.

Peaches fæddist árið 1989 og var aðeins fimmtán ára þegar hún byrjaði að skrifa dálka í tímaritið Elle. Hún fór að heiman sextán ára og var kynnir í þáttum á borð við OMG! with Peaches Geldof á ITV2. Hún vann líka sem fyrirsæta.

Hún skilur eftir sig eiginmann, tónlistarmanninn Thomas Cohen, og tvo syni, Astala, eins árs og Phaedra sem verður eins árs þann 24. apríl.

Móðir Peaches, Paula, lést úr of stórum skammti af eiturlyfjum í september árið 2000 en þá var Peaches ellefu ára.