Leiðtogi aðstandenda handtekinn

„Ég rændi stúlkunum ykkar,“ sagði Abubakar Shekau, leiðtogi samtakanna Boko Haram í Nígeríu. Þetta er í fyrsta sinn sem hann viðurkennir að samtökin beri ábyrgð á ráninu á hundruðum stúlkna og ungra kvenna um miðjan síðasta mánuði.

Hann sagði stúlkurnar vera þræla og hótaði að selja þær á markaðstorgi.

Samtökin hafa það yfirlýsta markmið að sjaríalögum múslima verði komið á í Nígeríu. Þau hafa undanfarin ár barist fyrir þessu með ofbeldi og árásum á skóla, kirkjur og fleiri staði þar sem almenningur kemur saman. Árásir þeirra hafa kostað hundruð manna lífið.

Nafn samtakanna, Boko Haram, mun þýða ‚Vestræn menntun er syndsamleg'.

Aðstandendur stúlknanna hafa harðlega gagnrýnt stjórn landsins fyrir að aðhafast lítið í málinu. Goodluck Jonathan forseti hefur verið sagður láta sig örlög stúlknanna litlu varða.

Fjölmenn mótmæli gegn stjórninni og forsetanum hafa af þessum sökum verið tíð síðustu daga.

Í gær var svo forsetafrúin, sem heiti Patience Jonathan, sökuð um að hafa látið handtaka einn helsta leiðtoga mótmælendanna. Talsmaður forsetafrúarinnar segir forsetafrúna engin völd hafa til þess að láta handtaka fólk.

Saratu Angus Ndirpaya, frá bænum Chibok, fullyrti hins vegar að tveir lögreglumenn hafi farið með sig og Mutah Nyadar, sem er einn helsti leiðtogi mótmælendanna, á lögreglustöð á mánudag að loknum næturlöngum fundi þeirra með forsetafrúnni á setri forsetans í Abuja.

Sér hafi strax verið sleppt, en Nyadar sitji enn í haldi. Þær hafi báðar verið sakaðar um að vera liðsmenn Boko Haram.

Hún segir hins vegar að forsetafrúin hafi á fundinum farið mikinn og hótað aðstandendum stúlknanna. Hún hafi sagt aðstandendurna hafa spunnið upp sögur af mannráninu í því skyni að sverta ímynd Nígeríustjórnar. Þá skoraði hún á aðstandendurna að hætta mótmælum, að öðrum kosti geti þeir kennt sjálfum sér um ef eitthvað kemur fyrir þá.

Lögreglan í Nígeríu segir að meira en 300 stúlkum hafi verið rænt. Rúmlega 50 þeirra hefur tekist að flýja, en 276 eru enn í haldi ræningjanna.