Hélt fyrst dansleik 14 ára

Jón Ólafsson er að undirbúa sextugsafmælið í Silfurbergssal Hörpunnar þegar hann er ónáðaður.

Hann býr í Hong Kong en er með vatnsfyrirtæki hér á landi svo hann kemur af og til og nú meðal annars vegna tímamótanna.

Jón var lengi kenndur við Skífuna en er í seinni tíð oftast titlaður „athafnamaður“, hvernig finnst honum það?

„Ég er nú alltaf eitthvað að aðhafast enda þrífst ég best í annríki og þannig hefur það alltaf verið," svarar hann. „Ég held það sé þorsti í að gera eitthvað sem skiptir máli.“

Jón er uppalinn í bítlabænum Keflavík og hóf snemma afskipti af tónlistarstarfsemi.

„Fimmtán ára var ég í hljómsveit á Keflavíkurvelli í sex mánuði en komst fljótt að því að ég væri betri í að vinna með listamönnunum en reyna að vera einn af þeim. Þannig að ég fór í umsýslu fyrir tónlistarmenn,“ upplýsir hann.

Hann kveðst hafa haldið fyrsta dansleikinn fjórtán ára.

„Ég fékk Ungmennafélagshúsið, Ungó, til að halda þar dansleik fyrir 14 ára og eldri og samdi við Pops í Reykjavík um að spila. Þegar strákarnir í Pops komu til Keflavíkur vildu þeir tala við Jón Ólafsson. „Ég er Jón Ólafsson,“ sagði ég. „Láttu ekki svona, við þurfum að tala við Jón Ólafsson,“ sögðu þeir. Ég var náttúrlega bara krakkakvikindi, ekki bara ungur heldur smávaxinn líka, en ég sagði þeim að hafa ekki áhyggjur, þeir fengju borgað, það væri uppselt.“

Þótt Jón hafi ekki alist upp við kaupsýslu var viðskiptavitið kannski í genunum.

„Ég þekkti ekkert föðurfólkið mitt en Ingvar Vilhjálmsson, stórútgerðarmaður í Ísbirninum, var afabróðir minn og föðuramma mín systir Arons Guðbrandssonar í Kauphöllinni. Þetta fólk var samt aldrei hluti af mínu lífi.“

Í veislunni í Hörpu í kvöld koma fram margar skemmtilegar hljómsveitir, sumar hafa ekki spilað í 25 ár eins og Brunaliðið sem Jón hóaði saman á sínum tíma og varð gríðarlega vinsælt enda með smelli eins og Alltaf á leiðinni, Einskonar ást og fleiri góða. Þar eru Ragga Gísla og Diddú, Laddi, Maggi Kjartans og Pálmi Gunnars.

Jón afbiður sér allar afmælisgjafir en hvetur fólk til að leggja fé í sjóð sem hann stofnaði í tilefni afmælisins. Féð sem safnast fer í gerð brunna í Afríku og veitir fólki vatn.

Slóðin á síðuna er: my.charitywater.org/jonolafsson.

Hér fyrir neðan er viðtal við Jón sem birtist í Kvöldfréttum Stöðvar 2.