Lovren á förum frá Southampton

Greint er frá því í enskum fjölmiðlum frá því í dag að Dejan Lovren, leikmaður Southampton og króatíska landsliðsins hafi lagt fram formlega beiðni um að verða seldur frá félaginu.

Hinn 24 árs gamli Lovren sem gekk til liðs við Southampton frá Lyon síðastliðið sumar sló í gegn í ensku úrvalsdeildinni í vetur. Undanfarnar vikur hefur Lovren verið orðaður við meðal annars Liverpool og Tottenham.

Þetta er gríðarlegt bakslag fyrir Southampton sem hefur nú þegar misst framherjann Rickie Lambert til Liverpool. Þá tók Mauricio Pochettino við liði Tottenham á dögunum.

Luke Shaw og Adam Lallana hafa óskað þess að Southampton samþykki tilboð sem berast í þá frá öðrum félögum en þeir hafa ekki enn lagt inn formlega beiðni líkt og Lovren.