Leit að flugvélinni hætt í dag

Leit að QZ8501, vél flugfélagsins AirAsia Indonesia, hefur verið hætt í dag þar sem myrkur er skollið á í Indónesíu. Leitarmenn segja líklegast að brak vélarinnar sé að finna á hafsbotni.

Vélin var af gerðinni Airbus A320-200 og hvarf af ratsjám í gær þegar vélin var á leið til Singapúr frá indónesísku borginni Surabaya. 162 manns voru um borð í vélinni.

Búist er við að leitarsvæðið verði víkkað á morgun. Fréttaritarar BBC í Singapúr og Surabaya segja að ættingjar farþega bíði angistarfullir fregna af vélinni. Flestir farþega vélarinnar eru Indónesar.

Í morgun bárust fréttir af því að brak úr vélinni hefði fundist í Jövuhafi en við nánari athugun reyndist svo ekki vera.

Flugmenn vélarinnar höfðu beðið um að breyta flugleiðinni eftir að hafa lent í slæmu veðri, en ekki voru send neyðarskilaboð áður en vélin hvarf af ratsjám milli eyjanna Borneó og Súmötru.