Reynir hæstánægður með þrennu í Hæstarétti

Reynir Traustason, fyrrverandi ritstjóri DV, er að vonum ánægður með málalyktir en Hæstiréttur sýknaði hann og son hans, Jón Trausta, af kröfum í þremur meiðyrðamálum í dag.

Hæstiréttur staðfesti tvo sýknudóma Héraðsdóms Reykjavíkur í málum sem Hilmar Leifsson höfðaði gegn feðgunum en sneri svo við einum dómi úr héraði sem hafði sakfellt Reyni og Jón fyrir meiðyrði um Hans Aðalstein Helgason.

„Ég er bara í mjög fínum gír, þetta er stór dagur,“ segir Reynir í samtali við Vísi.

„Þetta er þrenna í Hæstarétti, ég veit ekki hvort að einhver hafi áður unnið þrjú mál sama daginn í Hæstarétti. Mér finnst þetta bara frábært.“

Reynir segist hafa búist við því að Hæstiréttur myndi staðfesta sýknudómana í máli Hilmars Leifssonar en hann var ekki viss um hvernig færi með mál Hans Aðalsteins.

„Þetta er auðvitað góð niðurstaða en alvaran er nú þannig að ef svona mál tapast þá er enginn vilji hjá DV lengur til að standa á bak við blaðamenn eða ritstjóra. Ég hef fengið þá hótun að þeir ætli sér að láta falla á mig persónulega mál ef því er að skipta. Það er auðvitað grafalvarlegt fyrir blaðamenn en ég held reyndar að það geti aldrei haldið gagnvart fjölmiðlalögunum. Það breytir samt ekki því að þetta er sá illvilji sem er á ferðinni þarna að blaðamenn og ritstjórar, fyrrverandi og núverandi, að þeir þurfi bara að standa af sér málin. Það er alvaran í svona málum en auðvitað er bara gott að vinna þetta. Það er auðvitað enginn ágreiningur um það að þeir sem tapa, þeir borga.“

Hilmar Leifsson þarf því að borga málskostnað feðganna sem nemur um 2 milljónum króna. Þá var Hans Aðalsteinn dæmdur til að greiða þeim hvorum um sig 500.000 krónur í málskostnað.

„Þetta er auðvitað málskostnaður á tveimur dómsstigum svo þetta eru miklir peningar fyrir venjulegt fólk,“ segir Reynir og setur þetta samhengi við það að núverandi eigendur DV vilji að blaðamenn sjálfir standi straum af málskostnaði ef þeir tapa í meiðyrðamálum.

„Þetta er auðvitað grafalvarlegt mál fyrir blaðamenn á Íslandi, og nú er ég að tala sem fyrrverandi ritstjóri. Það er ekki hægt að bjóða venjulegum blaðamanni upp á það að hann þurfi að borga kannski 2-3 milljónir út af einhverju máli sem snýst um tjáningarfrelsi eða eitthvað slíkt.“