Nægt framboð af villtri gæs og önd fyrir hátíðarnar

Þeir skotveiðimenn sem náðu ekki rjúpum til að hafa um jólin og eru ekki reiðubúnir til að leggja út fyrir hreindýri ættu að skoða annan góðann möguleika á villibráð fyrir hátíðarnar.

Gæsaveiðin gekk vel hjá mörgum skyttum og framboðið af villtri gæs virðist vera nægt og verðið er ekki jafn hátt og heyrst hefur af þessum fáu rjúpum sem ganga núna kaupum og sölum.  Algengt verð fyrir rjúpu er 4000-5000 fyrir stykkið en það fer þó fáum orðum um hvort hún seljist á þessu verði.  Verðið á gæs og önd er aftur á móti mun lægra og ekki er það síðri hátíðarmatur heldur en rjúpur.

Þau verð sem veiðimenn eru að auglýsa á Facebook eru mjög svipuð.  Verð á grafinni gæs er 2000-2500 fyrir tvær bringur, reykt gæs er yfirleitt á 2500-3000 fyrir tvær bringur, venjulegar gæsabringur eru á 2000-3000 fyrir tvær bringur, heil gæs (reitt og sviðin) er á 4000-5000 fyrir stykkið og andabringur af stokkönd á 2000 fyrir tvær bringur.  Þetta voru algeng verð sem eru auglýst á Facebook og af viðbrögðum þeirra sem eru að selja má vel heyra að þeir sem eru rjúpnalausir eru farnir að snúa sér að annari villibráð og þá er gæsin virkilega girnilegur kostur.