Veiði

Þú veiðir betur þegar þú veiðir hægt

Karl Lúðvíksson skrifar
Púpur eins og Peacock er gott að veiða við botninn og draga inn löturhægt
Púpur eins og Peacock er gott að veiða við botninn og draga inn löturhægt

Það er ekkert óeðlilegt við það að þeir sem reyndari eru veiði meira en þeir sem eru nýbyrjaðir í sportinu en á bak við það liggur oft mjög einföld skýring.

Það fyrsta sem byrjendur gjarnan spyrja að þegar þeir leita ráða hjá vönum manni við bakkann er "hvað er hann að taka?". Gott og vel, það er mjög eðlileg spurning enda fyrsta forsendan fyrir því að silungur taki fluguna er að hún sé í takt við það æti sem fiskurinn er að taka. Aftur á móti þegar rétt fluga er komin á eru mestu mistökin oft gerð.

Í fyrsta lagi er oft verið að nota of svera tauma. Ef fiskurinn er taumstyggur og það á ansi oft við þegar veður er bjart, þarftu að grenna tauminn eins og þú þorir. Við flest silungsvötnin er nóg að nota 4-6 punda taum en oft á tíðum er verið að nota of svera tauma. Lítil fluga á sverum taum sekkur illa og þar af leiðandi er hún ekki að veiða á því dýpi sem fiskurinn er að taka.

Í öðru lagi er það lengdin á taumnum. Of stuttir taumar eru allt of algengir. Lítil fluga í stærð 14-16 þarf í það minnsta eina og hálga stangarlengd til að veiða djúpt ef hún er aðeins þyngd. Ef þú ert með þyngda flugu byrjar þú bara að draga fyrr inn, annars bíður þú þegar flugan er lent, leyfir henni aðeins að sökkva og dregur svo inn.

Það er nefnilega þriðja atriðið. Það er bara yfirleitt lang líklegast til árangurs að draga löturhægt inn. Ef þú ert að festa í botni láttu fluguna sökkva minna og það gerir þú með því að bíða styttra eftir að flugan er lent. 

Þetta eru kannski ekki algildar reglur, stundum þarf að gera hlutina á annan hátt en í prinsippinu er þetta það sem á líklega eftir að gera það að verkum að þér á eftir að ganga betur í vatnaveiði. 




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.