Stjórnskipunar- og eftirlitsnefnd boðar Hönnu Birnu á sinn fund

Stjórnskipunar- og eftirlitsnefnd Alþingis hefur ákveðið að taka fyrirhugað álit umboðsmanns Alþingi á samskiptum innanríkisráðherra og lögreglustjórans á höfuðborgarsvæðinu til umfjöllunar og boða ráðherra á fund nefndarinnar. Umræða hefur verið meðal stjórnarþingmanna um að nauðsynlegt sé að einstakir ráðherrar hafi stólaskipti.

Umboðsmaður Alþingis hyggst skila áliti vegna frumkvæðisathugunar embættisins á samskiptum Hönnu Birnu Kristjánsdóttur innanríkisráðherra og Stefáns Eiríkssonar fyrrverandi lögreglustjóra í næstu viku.

„Það hefur þegar verið tekin um það ákvörðun að fá umboðsmann Alþingis á fund nefndarinnar til að skýra niðurstöður sínar. Enn fremur hefur verið tekin um það ákvörðun að innanríkisráðherra komi á fund nefndarinnar til þess að svara spurningum nefndarmanna. Þetta liggur ljóst fyrir,“ segir Ögmundur Jónasson, formaður stjórnskipunar- og eftirlitsnefndar Alþingis. Hann segist eiga von á því að þetta verði gert um leið og álit umboðsmanns liggur fyrir.

Umræða um hrókeringar í ríkisstjórninni

Nokkur umræða hefur verið meðal stjórnarþingmanna um að æskilegt sé að það verði gerðar breytingar á ríkisstjórninni og einstakir ráðherrar hafi stólaskipti á þann veg að Hanna Birna Kristjánsdóttir taki við öðru ráðuneyti en innanríkisráðuneytinu.

Stjórnarþingmenn sem fréttastofa hefur rætt við segja þetta vangaveltur og ekkert sé fast í hendi. Málið sé sprottið af óánægju vegna lekamálsins svokallaða. Einnig vegna óánægju starfsmanna innanríkisráðuneytisins en málið mun hafa fengið mjög á þá. Þá hefur einnig verið nefnt í þessu samhengi að allur síðari angi lekamálsins sé eftir. Umboðsmaður eigi eftir að skila sínu áliti og þá eigi eftir að fara fram sérstök umræða í þinginu um samskipti ráðherrans og lögreglustjórans og sú umræða gæti skaðað ráðherrann.

Að sögn þeirra sem fréttastofa hefur rætt við hafa þessar hugmyndir um breytingar á ríkisstjórninni aldrei verið viðraðar af formanni Sjálfstæðisflokksins, Bjarna Benediktssyni, heldur komið upp í umræðum þingmanna sín á milli. Málið hefur heldur ekki verið rætt á fundum ríkisstjórnarinnar, samkvæmt upplýsingum fréttastofu.