Barst til eyrna að árásin hefði verið skipulögð

Mennirnir tveir sem ákærðir eru fyrir að hafa ráðist á samfanga sinn, Matthías Mána Erlingsson í fangelsinu á Litla-hrauni, neita báðir sök í málinu. Í vitnaleiðslum sögðu þeir að Matthías Máni hefði ýtt í þá og í kjölfarið hefði komið til slagsmála. Þeim er gefið að sök að hafa slegið hann í höfuð og líkama og notað hengilás við verknaðinn.

Hengilásinn var að klefa Baldurs Kolbeinssonar, annars ákærðu, og fannst á vettvangi árásarinnar. Lásinn var blóðugur og samkvæmt niðurstöðum rannsóknar tæknideildar lögreglu var blóðið úr Baldri. Lásinn var sendur til rannsóknar fimm mánuðum eftir atvikið og var því ekki ljóst hvenær blóðið var til komið. Eggert Kári Kristjánsson er einnig ákærður í málinu.

Tryggvi Ágústsson, deildarstjóri á Litla-Hrauni, kom að árásinni.

„Matthías lá alblóðugur á íþróttavellinum. Nokkrir fangar voru í kring og meðal þeirra voru þeir Eggert Kári og Baldur Kolbeinsson, en grunur beindist strax að þeim. Eggert var færður í aðskilnað og á leiðinni þangað viðurkenndi hann verknaðinn,“ sagði Tryggvi í vitnaleiðslum í dag. Þá sagði hann að sér hefði til eyrna borist að árásin hefði verið skipulögð.

Hjúkrunarfræðingur á bráðamóttöku á Selfossi, sem jafnframt bar vitni, sagði Matthías hafa verið illa leikinn eftir árásina. Sauma þurfti þrjá tveggja sentímetra skurði á enni og annað grunnt sár við annað augað. Þá var hann jafnframt með sár við nefrót og bólgið auga.

„Miðað við mynstur og annað, þá finnst mér líklegt að áhaldi hafi verið beitt. Þetta  var allavega ekki gert með berum höndum. Skurðirnir voru það jafnir,“ segir hjúkrunarfræðingurinn.

„En hann var yfirmáta rólegur og einstaklega kurteis. Hann áttaði sig ekki á hlutunum í fyrstu. Þegar hann tók að átta sig þá fór hann aðeins að æsast og fangaverðir fóru þá með hann.“

Aðalmeðferð í málinu fer nú fram í Héraðsdómi Suðurlands og er það höfðað af ríkissakóknara. Baldur Kolbeinsson, 24 ára, hefur hlotið fjölda refsidóma frá því hann var tæplega sautján ára. Eggert Kári á styttri refsiferil að baki.