Enginn vill fljúga með Malaysian Airlines

Á aðeins 5 mánaða tímabili fórust tvær af þotum Malaysian Airlines og það er greinilega ekki uppskrift af hagnaðarrekstri flugfélags. Malaysian heldur þó ennþá áfram rekstri en það gæti tekið skjótan enda ef fram fer sem horfir.

Svo virðist sem þeir sem komast þurfa á milli staða kjósi að sniðganga flugfélagið og því fer einkar vel um þá fáu sem þó það kjósa. Svo fáir ferðast nú með Malaysian að félagið tapar 2 milljón dollara á hverjum degi, eða um 230 milljónum króna.

Ekki er það til að bæta viðvarandi hallarekstur flugfélagsins en taprekstur hefur verið á því síðustu 3 ár. Svo gæti farið að félagið endi í kjöltu malasíska ríkisins, en þetta fjölmenna ríki telur sig þurfa að tryggja góðar flugsamgöngur í landinu á þessum sístækkandi markaði fyrir flug.

Þessi saga Malaysian er þekkt stef, en Pan Am fór á hausinn þremur árum eftir Lockerbie slysið í Skotlandi árið 1988. Þar átti þota frá Pan Am í hlut.

Einnig fór illa fyrir American Airlines eftir að tveimur þotum þeirra var stolið og flogið á tvíburaturnana í New York í 9/11 hryðjuverkunum og ein vél þeirra brotlenti í Queens hverfinu aðeins tveimur mánuðum eftir hryðjuverkin. Félagið var lýst gjaldþrota í kjölfarið, en endurreist með aðstoð bandaríska ríkisins.