Árásarmaðurinn úrskurðaður í gæsluvarðhald

Karlmaður á fertugsaldri sem stakk annan mann fjórum sinnum í brjósthol á laugardagskvöld hefur verið úrskurðaður í gæsluvarðhald í eina viku. Friðrik Smári Björgvinsson yfirlögregluþjónn fer fyrir rannsókninni og segir að rannsókn málsins þokist ágætlega áfram.

Árásarmaðurinn á sér töluverðan brotaferil að baki.

Þolandinn er af erlendu bergi brotinn og rétt eins og árásarmaðurinn er hann á fertugsaldri. Hann er búsettur hérlendis en ekki hefur fengist úr því skorið hvort mennirnir tveir þekkist.

Sjónarvottur sem varð vitni að atburðarrásinni frá upphafi til enda segir að árásarmaðurinn hafi verið með ógnandi tilburði inn á Bar 7 á Frakkastíg. Maðurinn sem var stunginn var þar í þriggja manna hópi.

Árásarmaðurinn hafi þar verið með Leatherman töng, sem er með hníf í öðrum endanum og sveiflað henni um.

Vitnið segir manninn greinilega ekki verið í jafnvægi og ölvaður, en sagði ekkert hægt að fullyrða um hvort hann hafi verið undir áhrifum fíkniefna. Dyravörður ræddi við manninn og einnig ungur maður sem virtist róa hann niður.

Vitnið fór út af Bar 7 og gekk upp að horni Frakkastígs og Laugavegs. Þá lenti mönnunum þremur saman við árásarmanninn. Þeim hafi þó tekist að hrekja hann í burtu með því að taka af sér belti og slá til hans.

Hann segir árásarmanninn, sem sé Íslendingur, hafa hlaupið upp að Laugarveginum blóðugur á höfði eftir beltissylgju. Síðan hafi hann rokið aftur niður Frakkastíginn og stungið einn mannanna margoft.

Tveir sjúkrabílar komu á staðinn eftir að tilkynning barst um árásina og var maðurinn fluttur á slysadeild. Þegar hann kom þangað var hann í stöðugu ástandi. Rannsókn leiddi í ljós að hann hafði verið stunginn margoft í brjóstkassa og kviðarhol. Sár mannsins voru þó ekki talin alvarleg og hefur hann því verið útskrifaður af sjúkrahúsi.