"Ég hafði veitt henni fyrstu hjálp oftar en einu sinni en það virkaði ekki í þetta sinn“

Leikkonan Skye McCole Bartusiak fékk nokkur flogaveikisköst í vikunni áður en hún lést að sögn móður hennar, Helen McCole Bartusiak, en Skye fannst látin á heimili fjölskyldu sinnar í Houston í Texas á laugardag.

Helen segir í samtali við CNN að dóttir hennar hafi fyrst fengið köst sem barn en að hún hafi ekki fengið þau í nokkur ár fyrr en í síðustu viku. Kærasti Helen kom að Skye látinni í íbúð sinni, sem var í bílskúr við heimili fjölskyldu hennar, á laugardaginn og telur móðir hennar að hún hafi fengið kast og kafnað.

„Enginn var heima,“ segir Helen en hún reyndi að endurlífga dóttur sína áður en sjúkraflutningamenn bar að garði.

„Ég hafði veitt henni fyrstu hjálp oftar en einu sinni en það virkaði ekki í þetta sinn,“ bætir hún við.

„Hún var góð og virkilega falleg stúlka. Hún hafði lifað yndislegu lífi,“ segir Helen um dóttur sína sem var hvað þekktust fyrir að leika í kvikmyndinni The Patriot með Mel Gibson.