„Vonandi kemur pokinn í leitirnar svo ég geti sofið“

Við heyrðum í Þráni Árna Baldvinssyni gítarleikara Skálmöld sem leitar að gítardótinu sínu sem glataðist á tónlistarhátíðinni Eistnaflugi eins og lesa má um hér. Hann biður fólk um að aðstoða sig við leitina.

„Ég vil taka það skýrt fram að ég held að dótinu hafi alls ekki verið stolið heldur er ég handviss um að þetta hefur verið tekið í misgripum með öðru dóti sem var þarna," segir Þráinn.

Sérsmíðaður gítarfetill

„Í pokanum er meðal annars sérsmíðaður gítarfetill, sá eini sinnar tegundar og rækilega merktur mér. Ef menn leita í sínu og skoða alla bakpoka sem hafa slæðst með er ljóst hver á pokann og því hægur leikur að skila - menn þurfa bara að líta eftir þessu. Ætli maður verði ekki bara að veita fundarlaun.“



„Eistnaflug er besta festival í heimi og líklegast hefur einhver óvart tekið bakpokann nú eða einhver afar tiltektarsamur hent þessu bak við einhvern álfastein og við hreinlega sjáum hann ekki. Vonandi kemur pokinn í leitirnar svo ég geti sofið - já og nært mig eðlilega,“ segir Þráinn.