Kynnist íslenskum kjarnakonum

„Ég held að allar konur og allir karlmenn hafi gott af því að horfa á þessa þætti. Við græðum öll á jafnrétti,“ segir dagskrárgerðarkonan Kolbrún Björnsdóttir en í kvöld hefur þátturinn Kjarnakonur göngu sína á Stöð 2.

Þar ræðir Kolla við fjöldan allan af íslenskum konum sem eiga það sameiginlegt að stjórna fyrirtækjum.

„Þetta eru alls konar konur sem stýra alls konar fyrirtækjum í mjög ólíkum geirum. Það sem þær eiga allar sameiginlegt er að þær vinna í mjög karllægu umhverfi. Konur eru enn í miklum minnihluta í forstjórastólum þó svo að þeim hafi vissulega fjölgað. Ég ræði ýmislegt við konurnar, hvernig umhverfið er í kjölfar hrunsins, hvernig framtíðin blasir við þeim í þessum bransa og fæ þeirra viðhorf á ýmsum málefnum, til dæmis á jafnréttismálum, og fæ að heyra hvað mætti  betur fara.“

Fyrsti þátturinn fer í loftið kl. 20 í kvöld en þar ræðir Kolla við Þórdísi Lóu Þórhallsdóttur, formann Félags kvenna í atvinnulífinu en Þórdís stýrir Pizza Hut hér á landi sem og í Finnlandi. „Það er mjög athyglisvert bera saman reksturinn í ESB-landi og landi sem stendur utan ESB,“ segir Kolla.