Vine-stjarna segir HIV hommasjúkdóm

Vine-stjarnan og Íslandsvinurinn, ef svo mætti kalla hann, Nash Grier gerði allt vitlaust í nýju Vine-myndskeiði sínu en þar segir drengurinn að kynsjúkdómurinn HIV sé einungis að finna á meðal samkynhneigðra karlmanna.

Myndskeiðið hefst á klippu af fornvarnarmyndbandi fyrir HIV, þar sem meðal annars er bent á að kynsjúkdómurinn sé ekki einungis bundinn samkynheigðum. Þá klippir Grier á myndskeiðið og kemur sínum skilaboðum rækilega á framfæri.

Þetta er alls ekki í fyrsta skipti sem Grier kemst í hann krappann á samfélagsmiðlum en áður en hann varð þekktur lét hann ýmsar fordómafullar athugasemdir í garð samkynhneigðra falla á Twitter. Þá birti hann einnig myndband á Youtube þar sem hann sagði að líkamshár kvenna væru ógeðsleg og að þau ætti að raka af.

Vine-myndskeið Grier var ekki lengi að rata í heimspressuna en hann eyddi myndskeiðinu stuttu síðar. Youtube-stjarna að nafni Tyler Oakley var þó með hraðar hendur og náði að vista myndskeiðið og birti það á Twitter-síðu sinni.

Grier var í slagtogi með Jerome Jarre þegar þeir komu hingað til lands í janúar. Þeir létu fylgjendur sína á Vine vita að þeir yrðu í Smáralind um klukkan fjögur hinn 5. janúar og myndaðist gríðarlegt öngþveiti í verslunarmiðstöðinni þegar fjöldi ungmenna safnaðist þar saman og slösuðust meðal annars nokkur börn. 

Call me and people like me, 'fag' all you want, but spreading false information about deadly diseases is next level. https://t.co/W6X9MUrgUK

— Tyler Oakley (@tyleroakley) July 6, 2014