Rosberg á ráspól í Kanada

Mercedes menn halda áfram að drottna í Formúlu 1. Nico Rosberg hafði betur gegn liðsfélaga sínum Lewis Hamilton hjá Mercedes í tímatökunni fyrir kanadíska kappaksturinn. Sebastian Vettel varð þriðji og Williams mennirnir Valtteri Bottas og Felipe Massa fylgdu Vettel fast á eftir. 

Fyrsta umferð tímatökunnar útilokaði sex hægustu ökumennina á brautinni. Í dag sátu eftir Marcus Ericsson og Kamui Kobayashi á Caterham, Jules Bianchi og Max Chilton á Marussia og Pastor Maldonado á Lotus.

Esteban Gutierrez var þegar orðin hluti af þessum hóp. Gutierrez mun þurfa að ræsa af stað af þjónustusvæðinu. Hann lenti í óhappi í æfingunni fyrir tímatökuna og þurfti að skipta um undirvagn í bíl hans. Hann náði þess vegna ekki að taka þátt í tímatökunni.

Í annarri lotu sat Adrian Sutil á Sauber eftir ásamt Daniil Kvyat á Toro Rosso, Romain Grosjean á Lotus og Kevin Magnussen á McLaren. Force India ökumennirnir Nico Hulkenberg og Sergio Perez sátu ennig eftir.

Í þriðju lotunni berjast ökumenn um tíu efstu sætin og þá fóru flestir út á ofur mjúkum. Ofur mjúku dekkin eru hraðari og mýkri útgáfa helgarinnar. Þau ná betra gripi en harðarin dekkin sem þessa helgina eru mjúk dekk.

Kimi Raikkonen átti í basli í síðustu lotunni, hann fór seint út og setti ekki tíma. Hugsanlega var ætlunin að spara dekk fyrir keppnina á morgun.

„Góð tímataka fyrir okkur sem lið, við náðum að bæta okkur í hverri lotu, þriðja sætið var möguleiki í dag en keppnin er á morgun og við getum barist við Red Bull,“ sagði Williams maðurinn Valtteri Bottas sem ræsir fjórði á morgun.

„Tímatakan er ekki svo mikilvæg hér, ef ég á að finna einhvern jákvæðan punkt,“ sagði Button á McLaren sem ræsir af stað í níunda sæti í keppninni.

„Nico stóð sig vel í dag ég hef hraðann ég bara nýtti hann ekki. Keppnin er á milli mín og Nico á morgun. Ég þarf að ræða við verkfræðingana til að finna út hvaða keppnisáætlun hentar mér á morgun,“ sagði Hamilton eftir tímatökuna í dag.

Niðurstaða tímatökunnar var:

1.Nico Rosberg - Mercedes

2.Lewis Hamilton - Mercedes

3.Sebastian Vettel - Red Bull

4.Valtteri Bottas - Williams

5.Felipe Massa - Williams

6.Daniel Ricciardo - Red Bull

7.Fernando Alonso - Ferrari

8.Jean-Eric Vergna - Toro Rosso

9.Jenson Button - McLaren

10.Kimi Raikkonen - Ferrari

11.Nico Hulkenberg - Force India

12.Kevin Magnussen - McLaren

13.Sergio Perez - Force India

14.Romain Grosjean - Lotus

15.Daniil Kvyat - Toro Rosso

16.Adrian Sutil - Sauber

17.Pastor Maldonado - Lotus

18.Max Chilton - Marussia

19.Jules Bianchi - Marussia

20.Kamui Kobayashi - Caterham

21.Marcus Ericsson - Caterham

Esteban Gutierrez - Sauber - ræsir af þjónustusvæðinu.