Gunnar Þorsteinsson, sem gjarnan er kenndur við Krossinn, kærði Steingrím Sævarr Ólafsson, Vefpressuna ehf auk Ástu Sigríði H. Knútsdóttur og Sesselju Engilráð Barðdal fyrir meiðyrði. Aðalmeðferð og málflutningur stendur nú yfir og er salur 101, sá stærsti í Héraðsdómi Reykjavíkur, svo troðinn að þar komast færri að en vilja, til að fylgjast með.
Málið, sem er býsna flókið og á sér langan aðdragandi; tengist ásökunum á hendur Gunnari, þess efnis að hann hafi áreitt sjö konur í Krossinum. Gunnar hefur ávallt haldið því fram að þessar ásakanir tengist pólitík og valdabaráttu í söfnuðinum og haldið fram sakleysi sínu. Pressan birti nokkrar fréttir af þessum ásökunum, sú fyrsta var 23. nóvember 2010 og krafðist Gunnar þess að vefmiðillinn drægi fréttirnar til baka en þáverandi ritstjóri, Steingrímur Sævarr Ólafsson sagði miðilinn standa við fréttirnar. Í kjölfar þessa kærði svo Gunnar.
Lögreglan rannsakaði málið og var niðurstaðan sú að ekki taldist ástæða til að fara lengra með málið og var kærum vísað frá. Gunnar hefur haldið því fram að það sýni og sanni að ásakanirnar hafi verið algerlega tilhæfulausar, meðan þær konur sem um ræðir hafa talað um að málið hafi einfaldlega talist fyrnt.
Nokkuð hefur farið fyrir báðum málsaðilum á Facebook og hafa stuðningsmenn kvennanna hvatt fólk eindregið til að mæta við réttarhöldin og svo virðist sem margir hafi orðið til að svara því kalli.
