Stundum er best að láta Balotelli í friði

Clarence Seedorf, þjálfari AC Milan, segir að Mario Balotelli yrði enn öflugri leikmaður ef hann fengi einhvern tímann frið frá fjölmiðlum.

Það er alltaf mikið líf í kringum Balotelli og því hafa fjölmiðlar eðlilega mikinn áhuga á honum.

"Balotelli er alltaf að bæta sig. Hann var ósáttur við að fara af velli í síðasta leik. Við ræddum það bara eins og fullorðnir menn. Það var ekkert mál," sagði Seedorf.

"Blaðamenn hafa ekki hjálpað honum að þroskast. Ég hef talað við hann og reynt að gagnrýna hann á uppbyggilegan hátt. Það geri ég án þess að tala um okkar mál í fjölmiðlum.

"Það er stundum einfaldlega betra að láta hann í friði. Mér finnst hann ekki fá hrós fyrir sínar jákvæðu hliðar. Það er aðeins fjallað um hann á neikvæðan hátt. Það hjálpar ekki."