Gunnar Nelson þykir sá allra svalasti

Samkvæmt glænýrri könnun MMR, sem kynnt var á markaðsráðstefnu í Háskólabíó í gær, kemur á daginn að bardagaíþróttamaðurinn Gunnar Nelson þykir sá svalasti á Íslandi nú um mundir. Honum fylgja svo menn á borð við Jón Gnarr borgarstjóri, Baltasar Kormákur kvikmyndaleikstjóri, Ari Eldjárn skemmtikraftur, Ásgeir Trausti tónlistarmaður og Egill Einarsson, eða Gillz, líkamsræktarfrömuður með meiru.

Til óformlegra kannana sem þessara hefur verið efnt með reglubundnum hætti sem einskonar samkvæmisleiks á síðum fjölmiðla en nýtt er að virðulegt markaðsrannsóknarfyrirtæki á borð við MMR leggi út í viðamikla könnun sem þessa. En, í þessari könnun var lagt upp með hvað væri mest „cool“ eða svalast, og þá einkum í því sem snýr að vörumerkjum.

Ólafur Gylfason hjá MMR segir að svalasti einstaklingurinn sé hliðarafurð. „Þetta var ekki megintilgangur rannsóknarinnar heldur hliðarafurð sem gegnir þeim tilgangi að skýra út af hverju það kann að vera að fólki finnst tiltekin vörumerki svöl og þá hvaða persónuleika þau tengja við í því samhengi. Hvers konar persóna er vörumerkið?“

Ólafur segir að MMR sé náttúrlega markaðsrannsóknafyrirtæki og þetta sé eitt af lykilhugtökum sem unnið er með í markaðsstarfi. Og í þessu sambandi er einkum litið til þess hvað er ofarlega á baugi í yngri aldurshópum. „Hver eru helstu hugðarefni þeirrar kynslóðar. Við efndum til ráðstefnunnar í samstarfi við við þá Joeri Van den Bergh, sem er Belgi og Mattias Behrer sem er sænskur.“ Þeir hafa rannasakað og skoðað hvernig nálgast skuli þennan mikilvæga hóp en þeir skrifuðu meðal annars bókina „How Cool Brands Stay Hot: Branding to Generation Y“.

En, aftur að þeim sem þykja svalastir á Íslandi nú um stundir. Þeir sem einnig komast á blað eru Aron Pálmarsson, Bubbi  Morthens, Þorvaldur Davíð, Ólafur Ragnar Grímsson, Skúli Mogensen, Björn Bragi, Helgi Seljan og Hilmar V. Pétursson.