Red Bull fyrir rétt

Áfrýjunardómstóll Alþjóða akstursíþróttasambandsins tekur í dag fyrir mál Red bull ökumansins Daniel Ricciardo. Hann var dæmdur úr keppni eftir að hafa lokið keppni í öðru sæti í Ástralíu.

Red Bull vill ná í annað sætið og stigin 18 sem fást fyrir það. Alþjóða akstursíþróttasambandið (FIA) vill standa fast á sínu og halda trúverðuleika sínum.

Málið snýst um að samkvæmt reglum má eldsneytisflæði í formúlubílum ekki fara yfir 100 kg/klst. Red Bull taldi sig ekki hafa farið yfir það og segir að þeirra mælitæki muni sanna það. Formlegur flæðimælir í bíl Ricciardo sýndi tölur yfir leyfilegu marki.

Aðgerðir Red Bull eru líka til skoðunar. Red Bull brást ekki rétt við, liðið hunsaði tæknilegar leiðbeiningar sem öll lið fá útgefnar af Charlie Whiting. Sem segja hvað skal gera ef flæðimælir bilar. Einnig hunsaði liðið afskipti FIA í keppninni sjálfri.

Liðsstjóri Red Bull, Christian Horner telur liðið hafa haft fullan rétt til að hunsa afskipti FIA, sem voru í samræmi við tæknilegar leiðbeiningar Charlie Whiting. Vegna þess að þær eru ekki bindandi heldur einungis leiðbeiningar að mati Horner.

Óttast er að ef Red Bull tekst að sannfæra dómarana þá muni það hafa gríðarlegar afleiðingar. Allir geta þá farið að fylgja reglum eftir eigin mælingum og formleg mælitæki fái að fjúka.



Graeme Lowdon liðsstjóri Marussia sagði „það myndi opna flóðgáttir.“

„Það er ástæða fyrir því að við höfum kerfi þar sem FIA gefur þeirra álit. Það gerist mjög oft,“ sagði Lowdon.



„Við leitum álits hjá Charlie Whiting á mörgum atriðum og hann gefur það og ég held að það sé almennt talið gott fyrir liðin að fylgja því áliti, jafnvel þó að það sé ekki gert hluti af reglum,“ hélt Lowdon áfram.

Ef Red Bull vinnur málið kemst liðið í annað sæti í keppni bílasmiða. Liðið er nú í fjórða sæti. Það er því mikið í húfi.