Óljóst hvort ráðherra opni glufu eða útiloki Airbus

Innanríkisráðuneytið vill, meðan óvissa er um framtíð Reykjavíkurflugvallar, ekki taka afstöðu til þess hvort Airbus-þotum Færeyinga verði leyft að nota völlinn. Samgöngustofu og Isavia er hins vegar falið að ræða saman um lausn, sem þó má ekki opna á almennt millilandaflug á stórum þotum frá Reykjavík.

Reykjavíkurflugvöllur hefur ætíð haldið þeirri stöðu að vera millilandaflugvöllur gagnvart Færeyjum og Grænlandi en nú eru horfur á að það geti breyst, - að minnsta kosti gagnvart Færeyjum. Færeyska félagið Atlantic Airways hefur ákveðið að hætta notkun á 95 sæta British Aerospace-þotum í sumar en þær hafa haft undanþágu til að nota völlinn í reglubundnu flugi.

Það vefst hins vegar fyrir íslenskum flugmálayfirvöldum hvort leyfa eigi Færeyingum í staðinn að nota 130 sæta Airbus-þotur á hinum umdeilda flugvelli. Þær eru þó talsvert minni en Boeing 757-vélar Icelandair sem lenda þar af og til.

Isavia óskaði fyrir tveimur mánuðum eftir leiðbeiningu innanríkisráðuneytis en fékk fyrir helgi í raun það svar að Samgöngustofa og Isavia ættu að ræða saman um málið. Í svarbréfi fyrir hönd ráðherra vísar innanríkisráðuneytið þó til þess að meginhlutverk Reykjavíkurflugvallar sé í þágu innanlandsflugs og að völlurinn búi við undanþágur frá flugvernd sem þurfi að gæta að. Þá segir ráðuneytið ekki ástæðu til að taka afstöðu til þess hvort veita eigi heimild til að nota þotur í stærðarflokki C, sem Airbus A-319 tilheyrir, meðan fram fer vinna um framtíð Reykjavíkurflugvallar.

Óljóst svarbréf ráðuneytisins þykir lýsandi fyrir vandræðaganginn í málinu og endurspegla átökin um framtíð flugvallarins. Jafnframt má greina ótta í stjórnkerfinu um að heimild til Færeyjaflugs þýði að önnur flugfélög komi á eftir og biðji um að fá að fljúga samskonar þotum frá Reykjavík til annarra landa, og ótta um að Íslendingar missi undanþágu frá vopnaleit í innanlandsflugi ef farþegar þess blandast millilandafarþegum.

Heimildarmenn innan stjórnkerfisins eru ekki sammála um hvort ráðuneytið hafi með svari sínu í raun útilokað Airbus Færeyinga frá Reykjavík eða hvort haldið sé opinni glufu til að finna sérlausn með orðalagi um að rétt sé að meta hvert tilvik fyrir sig. Isavia og Samgöngustofu er að minnsta kosti falið að ræða saman um málið.