Nickelback er frábær hljómsveit

Hljómsveitin Nickelback eru án nokkurs vafa ein hataðasta hljómsveit mannkynssögunnar. Fólk hefur samt eiginlega ekki hugmynd um af hverju það hatar sveitina svona mikið og þeir sem fíla hana myndu aldrei þora að viðurkenna að þeir fíli sveitina.

Alltaf þegar þeir gefa út plötu selst hún í mörgum milljónum eintaka og er hún í raun mjög vinsæl. Þarf fólk ekki bara að leggja Nickelback-fordómana til hliðar eitt augnablik?

Breska veftímaritið Whatculture! tók saman tíu ástæður fyrir því af hverju Nickelback er frábær hljómsveit.

1. Tónlistarmyndböndin þeirra eru skemmtileg, frábær og mjög vel gerð. Fallegt kvenfólk, fallegir karlmenn, partý og annað skemmtilegt bregður gjarnan fyrir í myndböndum sveitarinnar.

2. Þeir eru mjög duglegir og hafa unnið hörðum höndum að því komast á þann stall sem þeir eru á í dag.

3. Nickelback eru frábærir á tónleikum. Þeir hljóma vel, líta vel út og eru tónleikar þeirra í raun veisla fyrir bæði augu og eyru.

4. Þeir eru miklir húmoristar og hefðu aldrei náð svona langt ef þeir hefðu ekki húmor fyrir sjálfum sér og gríninu sem gert er að þeim.

5. Tónlistin þeirra er mjög fjölbreytt. Þeir spila hart rokk, þeir spila rólega ballöður og þeir spila jafnvel poppað rokk. Það er ekki hægt að segja að öll lögin þeirra séu eins.

6. Sveitin samanstendur af frábærum hljóðfæraleikurum. Hver og einn meðlimur sveitarinnar er fagmaður á sínu sviði og það heyrist greinilega þegar sveitinni er ljáð eyra.

7. Þeir eru alvöru djammarar og þar af leiðandi alvöru rokkstjörnur. Erfitt er að finna jafn mikla djammara í bransanum og Nickelback.



8. Þeir láta gott af sér leiða og styrkja ýmis góðgerðarmál. Þeir gáfu alla innkomu af laginu If Everyone Cared til góðgerðarmála.

9. Þeir eru auðmjúkir. Til að mynda fékk söngvari sveitarinnar, Chad Kroeger stein í hausinn á tónleikum í Portúgal og sagði þá: „Er enginn Nickelback aðdáandi í salnum?" Þeir láta aldrei stríðni og háð fara í taugarnar á sér.

10. Aðalmálið er hins vegar það, að það kunna allir lögin þeirra. Það er virkilega erfitt að finna manneskju sem ekki getur hummað eða sungið eitthvert Nickelback stef.