Joe Cole til Aston Villa

Aston Villa tilkynnti rétt í þessu að Joe Cole hefði skrifað undir hjá félaginu í dag en þessi fyrrum enski landsliðsmaður samdi við Villa til tveggja ára.

Hinn 32 árs gamli Cole var leystur undan samningi hjá West Ham en hann var ekki lengi að finna sér nýjan klúbb. Cole hefur áður leikið með Chelsea, Liverpool og West Ham en hann vann ensku úrvalsdeildina þrisvar með Chelsea.

Cole er annar maðurinn sem kemur inn um dyrnar hjá Aston Villa en Philippe Senderos gekk til liðs við Villa fyrir stuttu á frjálsri sölu frá Valencia.

„Þetta er stór klúbbur sem gefur mér nýtt tækifæri. Ég hef átt góðan feril en það eru nokkrir hlutir sem ég á eftir að gera og næ vonandi með Aston Villa,“ sagði Cole.