Hreyfing komin á mál lífeyrissjóða vegna launa slitastjórnar

Fimm lífeyrissjóðir, sem krefjast þess að Steinunn Guðbjartsdóttir og Páll Eiríksson í slitastjórn Glitnis endurgreiði slitabúi bankans hátt í hálfan milljarð króna vegna ofgreiddra launa, munu skila greinargerð í málinu í maí næstkomandi. 

Lífeyrissjóðirnir fimm eru á meðal kröfuhafa Glitnis, en þetta eru Lífeyrissjóður verzlunarmanna, Gildi lífeyrissjóður, Sameinaði lífeyrissjóðurinn, Söfnunarsjóður lífeyrisréttinda og Festa lífeyrissjóður.

Tveir þessara lífeyrissjóða óskuðu eftir því haustið 2012 að fá sundurliðun á launakostnaði slitastjórnar Glitnis og greiðslum til félaga í eigu þeirra Páls Eiríkssonar og Steinunnar Guðbjartsdóttur í slitastjórn bankans. Kröfuhafarnir höfðu grunsemdir að kostnaðurinn væri óeðlilega hár.

Í sundurliðuðu yfirliti yfir kostnað kom fram að sameiginlegar greiðslur til slitastjórnarmannanna tveggja, Steinunnar og Páls, ásamt útseldri vinnu fulltrúa á þeirra vegum, hafi numið 842 milljónum króna samtals frá því að slitastjórnin var skipuð í maí 2009 og fram á mitt ár 2012.

Lífeyrissjóðirnir fóru fram á að þau Páll og Steinunn endurgreiddu slitabúi Glitnis tæplega hálfan milljarð króna sem þeir telja vera ofgreidda þóknun á tímabilinu frá maí 2009 fram á mitt ár 2012 en tekist er á þessa kröfu fyrir dómstólum. Steinunn sagði í samtali við Vísi í fyrra þegar málið kom fyrst upp að greiðslurnar væru eðlilegt endurgjald fyrir þá vinnu sem hefði verið innt af hendi.

Fyrirtaka var í málinu í dag í Héraðsdómi Reykjavíkur. Samkomulag náðist um frest til að leggja fram greinargerð í málinu og verður næsta fyrirtaka hinn 2. maí næstkomandi.