Telja slitastjórn hafa oftekið 400 milljónir

Fimm lífeyrissjóðir telja Steinunni Guðbjartsdóttur og Pál Eiríksson, sem sitja í slitastjórn Glitnis, hafa oftekið sér yfir 400 milljónir króna í laun fyrir störf sín, og sinna fyrirtækja, fyrir þrotabú bankans. Sjóðirnir vilja að Héraðsdómur Reykjavíkur láti Steinunni, Pál og fyrirtækin endurgreiða þrotabúinu hin ofteknu laun. Þeir hafa sent héraðsdómi bréf þar sem lagðar eru fram þær forsendur sem sjóðirnir telja eðlilegt að stuðst sé við þegar slitastjórnin reikni sér laun. Samkvæmt þeim forsendum hafi þau laun sem Steinunn og Páll hafa greitt sér, alls 842 milljónir króna frá því að þau voru skipuð og fram á mitt síðasta ár, verið mun hærri en sjóðirnir telja eðlilegt.

Lífeyrissjóðirnir fimm eru á meðal kröfuhafa Glitnis. Þeir eru Lífeyrissjóður verzlunarmanna, Gildi lífeyrissjóður, Sameinaði lífeyrissjóðurinn, Söfnunarsjóður lífeyrisréttinda og Festa lífeyrissjóður. Tveir fyrstnefndu sjóðirnir óskuðu eftir því síðastliðið haust að fá sundurliðaðar upplýsingar um launakostnað Glitnis. Þeir vildu sérstaklega fá upplýsingar um laun sem greidd væru til slitastjórnarmanna og hugsanlega til einhverra fyrirtækja á þeirra vegum. Tilgangurinn var að kanna hvort það gæti verið að þóknanir fyrir þau störf sem verið væri að vinna væru óhóflegar.

Þegar slitastjórnin neitaði að láta upplýsingarnar af hendi hótuðu sjóðirnir að fara með málið fyrir dómstóla. Í kjölfarið ákvað slitastjórnin að gefa eftir og lét þá hafa sundurliðun á kostnaðinum í lok september 2012. Þar kom fram að sameiginlegar greiðslur til þeirra tveggja, með útseldri vinnu fulltrúa á þeirra vegum, hafi numið 842 milljónum króna frá því að slitastjórnin var skipuð í maí 2009 og fram á mitt síðasta ár.

Þetta töldu sjóðirnir ekki vera eðlilega þóknun fyrir opinbera sýslunarmenn. Þeir ráðfærðu sig við aðra lífeyrissjóði sem eiga samþykktar kröfur í bú Glitnis og fengu þrjá til viðbótar til liðs við sig. Hópurinn lét reikna út hvað hann teldi eðlilega þóknun vegna þeirrar vinnu sem Steinunn, Páll og fulltrúar þeirra hafa innt af hendi.

Niðurstaða þeirra útreikninga er að slitastjórnarmennirnir, og fyrirtæki þeirra, hafi oftekið sér 383 milljónir króna í þóknanir fram á mitt síðasta ár. Þá á eftir að að taka með í reikninginn þær þóknanir sem þeir hafa greitt sér síðan þá og vaxtakostnað. Samanlagt ætla sjóðirnir að slitastjórn Glitnis hafi oftekið sér yfir 400 milljónir króna vegna vinnu sinnar fyrir búið.

Sjóðirnir fimm sendu Héraðsdómi Reykjavíkur, sem skipaði slitastjórnina, bréf í síðustu viku þar sem þeir fóru fram á að dómurinn léti slitastjórnarmennina tvo endurgreiða þrotabúinu hinar ætluðu ofteknu þóknanir.