Réðst á bróður afa síns

Héraðsdómur Norðurlands eystra dæmdi í dag Gústaf Reyni Gylfason í þriggja ára og sex mánaða óskilorðsbundið fangelsi fyrir stórfellda líkamsárás. Þá var ákærða gert að greiða 1.327.969,- krónur í miska- og skaðabætur. Í lýsingu á málavöxtum kemur fram að þann 10. febrúar ruddist ákærði ölvaður í heimildarleysi inn á heimili brotaþola með því að kasta stórum stein í gegnum rúðu á húsinu og fara þannig inn í stofu hússins. Þar veittist ákærði með hrottafengnum hætti að brotaþola með því að slá í höfuð og búk brotaþola. Þá barði hann ítrekað með 15,5 kg þungum stól.

Brotaþoli hlaut mikla áverka og heilablæðingu við árásina en í dóminum kemur fram að ekki hafi verið hægt að sjá augu hans vegna þess hversu bólgið andlit hans var á vettvangi. Þá var íbúð hans mjög illa leikin eftir atlöguna. Heyrn brotaþola versnaði mjög eftir árásina.

Ákærði játaði brot sín greiðlega, sem var metið honum til refsilækkunar. Hins vegar urðu ýmis atriði þess valdandi að refsingin var þyngd, meðal annars að árásin átti sér stað á heimili brotaþola.

„Ég hataði hann af öllu mínu hjarta"

Ákærði og brotaþoli eru tengdir fjölskylduböndum, en móðir ákærða er bróðurdóttir brotaþola. Af dóminum má ráða að rót málsins má rekja til meintrar kynferðislegrar misnotkunar brotaþola á barnungri móður ákærða. Ákærði hélt því fram að er hann gekk framhjá heimili brotaþola hafi „smollið eitthvað í hausnum á honum" og honum hefði skyndilega dottið í hug að ganga í skrokk á brotaþola. Fyrir dómi sagði ákærði að hann hefði hatað brotaþola af öllu sínu hjarta vegna hinna ætluðu brota hans gagnvart móður sinni. Ákærði tók það þó fram að hann hefði ekki haft ásetning til að drepa brotaþola.

Ákærði, sem er 24 ára, hefur áður verið dæmdur fyrir vörslu fíkniefna og akstur undir áhrifum fíkniefna.

Ekki hefur verið tekin ákvörðun um áfrýjun dómsins af hálfu ákærða.