Kaffistofa Samhjálpar hlaut Samfélagsverðlaun Fréttablaðsins

Samfélagsverðlaun Fréttablaðsins voru afhent við hátíðlega athöfn síðdegis í dag. Þetta er í áttunda sinn sem Fréttablaðið veitir Samfélagsverðlaunin en þau eru veitt í fjórum flokkum auk heiðursverðlauna.

Kaffistofa Samhjálpar býður upp á mat og kaffi fyrir utangarðsfólk og aðstöðulausa og hefur verið starfrækt frá árinu 1982. Fyrstu árin var opið virka daga og á stórhátíðum. Haustið 2001 bættist svo við helgaropnun og hefur kaffistofan verið opin alla daga síðan. Að jafnaði fær kaffistofan rúmar hundrað heimsóknir á dag eða upp undir 40 þúsund á ári. Tveir starfa á kaffistofunni, sem að auki nýtur liðsinnis sjálfboðaliða.

Ari Edwald, forstjóri 365, afhenti fulltrúum Kaffistofu Samhjálpar verðlaunin og verðlaunafé að upphæð tólf hundruð þúsund.

Aðrir sem voru útnefndir til Samfélagsverðlaunanna:

Kattholt

Alzeimer-kaffi

Hvunndagshetja

Hvunndagshetja ársins er Sigurlaug Hermannsdóttir sem hefur verið ötul um árabil í félagslífinu á Blönduósi. Meðal annars býður hún ásamt manni sínum, eldri borgurum á Blönduósi til árlegrar veislu heima hjá sér.

Aðrir sem voru tilnefndir í þessum flokki:

Guðmundur Stefán Gunnarsson

Halldór Gunnar Pálsson

Frá kynslóð til kynslóðar

Verðlaun í þessum flokki fær Margrét Pálmadóttir sem hefur unnið mikilsvert starf með kórum og um árabil stuðlað að söngmennt stúlkna og kvenna.

Aðrir tilnefndir í þessum flokki:

Félag eldri borgara á Suðurnesjum og grunnskólar í Reykjanesbæ

Steindór Andersen

Til atlögu gegn fordómum

Projekt Polska hlýtur verðlaun fyrir atlögu gegn fordómum. Hópur ungra Pólverja vinnur að aðlögun og eflingu félagsstarfs og bættum aðstæðum innflytjenda á Íslandi.

Aðrir tilnefndir í þessum flokki:

ADHD-samtökin

Sendiherrar Sameinuðu þjóðanna um réttindi fatlaðra

Heiðursverðlaun

Heiðursverðlaun Samfélagsverðlauna Fréttablaðsins hlýtur Óli H. Þórðarson

Óli H. Þórðarson hefur um margra áratuga skeið verið ötull talsmaður bættrar umferðarmenningar og lagt sitt af mörkum til að fækka  umferðarslysum á Íslandi.

Um verðlaunin

Á fjórða hundrað tilnefningar bárust frá lesendum Fréttablaðsins að þessu sinni. Markmið með Samfélagsverðlaununum er að beina sjónum að þeim góðu verkum sem unnin eru í samfélaginu. Þetta er í áttunda sinn sem Fréttablaðið veitir Samfélagsverðlaunin.

Samfélagsverðlaun Fréttablaðsins eru sem fyrr segir tólf hundruð þúsund krónur, aðrir verðlaunahafar fengu tíu tommu United spjaldtölvu frá Tölvulistanum auk verðlaunagripa sem eru hannaðir og smíðaðir af Ásgarði, Mosfellsbæ.

Dómnefnd var þannig skipuð: Arndís Þorgeirsdóttir, fréttastjóri Fréttablaðsins, var formaður nefndarinnar.

Aðrir: Anna Kristinsdóttir, mannréttindastjóri Reykjavíkurborgar og Þorsteinn J. Vilhjálmsson dagskrárgerðarmaður.